「主賜的團隊，你珍惜嗎❓」
如珍惜，請盡自己的責任。
……
17/05/2022（二）20:30 香港國際音樂學校310室
合唱團
副校長轉向右手邊第一行的同學，我坐在當中。
副校長說：「Bass。」
我吞了一啖口水。
副校長說：「你哋練習成點？自己同自己評個分，10分俾幾多分自己。」
同學A說：「7分。」
我說：「8.5分。」
同學B說：「7分。」
同學C說：「6分。」
同學D說：「7分。」
同學E說：「6分。」
同學F說：「4分。」
副校長說：「8.5分，你唱。」
我說：「我呀？」
副校長說：「你俾8.5分自己呀嘛。」
我說：「係呀。」
副校長說：「你唱，I Will Be With You，Bar 10，2nd beat，開始。」
琴聲響起。
我唱：「When you pass through the water,__ when you walk through the fire,__ when the riv-ers o-ver-flow, I will be with you.__」
副校長說：「停，勉強合格，5分。」
副校長點評一番，明確指出要努力改進的地方。
一輪檢視之後，
副校長說：「呢嗰咁嘅狀態，9月點出Musical？我哋有好多持分者，成廿幾人嘅Orchestra，仲有成800個觀眾，如果繼續係咁，9月我哋唔一定可以一齊出到musical。我哋係一個團隊，同一team，大家究竟有冇盡自己嘅責任練習好？」
……
另一個我說：「副校長咁講嘢，好mean！」
我說：「唔覺喎。」
另一個我說：「喂，佢話你得5分呀，8.5分，手指拗出唔拗入。」
我說：「8.5分係我自評啫，但根據副校長嘅標準，我真係值5分咋嘛，講老實說話有咩問題？」
另一個我說：「但係佢喺全隊Choir面前話你呀？你唔覺得醜嘅咩？」
我說：「你咁怕醜做咩？咁怕醜唔好跟我番合唱團，你自己死番去反鎖自己喺band房。」
另一個我說：「好難聽呀你講嘢，完全唔顧我感受，我唔忍心你當眾出醜咋。」
我說：「我都唔知有咩咁醜？副校長老實講出佢嘅評價，話我得5分，係關心提醒我，黎緊嗰三個月嘅練習仲要盡多5分力。」
另一個我說：「喂，合唱團，你有俾錢架，佢咁講嘢？」
我說：「俾幾多咁巴閉呀？今個學期俾咗嗰一千蚊左右，而家有副校長個個禮拜二教你，有成班同學個個禮拜二同你一齊練習，學校音樂廳有個舞台俾你表演，到時表演仲有隊廿幾人嘅Orchestra同你伴奏，你嗰一千蚊，都唔知請得郁邊個，食三餐《壽司郎》都未必夠呀。」
另一個我說：「你咁講法即係咩意思？」
我說：「請珍惜主賜嘅團隊合作機會。」
另一個我說：「我好珍惜感恩架，我起身、刷牙、番工、放工、食飯、打機、WhatsApp、傾電話、睇YouTube，做晒自己要做嘅嘢之後，上床臨瞓覺之前，都會禱告感謝主，得閒仲喺手機度俾啲感謝嘅Emoji添架。」
我說：「收啦，你呢啲一分鐘都唔駛嘅廉價感謝，主嘅救贖係重價架，犧牲自己呀，副校長為合唱團所付出嘅心機同時間唔係我哋想像得到架。」
另一個我說：「咁唔咪你想我點啫？」
我說：「唔係我想你點，係如果你真係衷心珍惜感謝主重價嘅救贖，衷心珍惜感謝副校長大大嘅付出，衷心珍惜感謝合唱團每一位同學嘅努力嘅話，唔該你尊重主賜嘅團隊，盡番你做團員嘅責任。」
另一個我說：「即係點呀？」
我說：「即係每日盡埋嗰5分力練習，唱好你嘅Bass囉。」
另一個我說：「咁其他主賜嘅團隊，你又有冇盡責？」
我說：「你喺咪發雞盲呀？我喺《Maggie移加講耶穌》群組，日日做緊啲咩？」
另一個我說：「我唔知你做緊啲咩喎！你做緊啲咩呀？」
我說：「你梗係唔知啦，你唔係喺度隔岸觀火，沉默是金，就係漠不關心、不聞不問，大時大節先出一兩個廉價感謝Emoji。我唔會好似你咁，我非常珍惜主賜俾我查組小組。我個個月都有奉獻，日日都把握同群組組員相交嘅機會，星期一至五喺WhatsApp跟計劃讀經、同組員交流，禮拜六晚就預留時間出席Zoom查經，禮拜日就做每週分享、讀經音檔，日日都盡緊自己組員嘅責任。」
……
17/05/2022（二）08:11 合唱團Tenor & Bass WhatsApp群組
同學說：「由下星期開始，合唱團將會延長至9:50pm完結，大家不用加錢，就可享用呢個優惠，敬請預留時間。」
我說：「真的是大好消息！已預留時間，非常感謝副校長進一步付出她寶貴的心機和時間。我禱告求主帶領協助我們，好好調整心神，合理分配時間，每天練習好自己的聲部，盡自己合唱團團員的責任，回應副校長的厚愛，並把握好主賜珍貴的演出機會。」
發表新回應