「禱告，為了什麼❓」
改變自己，迎合主的心意。
……
28/04/2022（四）17:30 慈雲山
實科演奏課完結，我跟同學吃晚餐。
侍應說：「食咩？」
同學說：「肉醬意粉，凍檸茶。」
我說：「瑞士雞翼撈麵，華田雪山。」
同學說：「你文憑讀成點？」
我說：「唔錯呀。」
同學說：「你和聲跟到？」
我說：「我最叻就係和聲，和聲唔惦，點讀作曲呀？你呢？」
同學說：「其實我真係想放棄，我連基礎樂理都攪唔惦。」
我說：「我已經係第二次聽你講想放棄。」
同學說：「學嚟學去都係咁上下。」
我說：「上次見你，你睇譜好慢，有冇進步？」
同學說：「都有啲嘅。」
我拿出樂譜。
我說：「呢個咩音？」
同學說：「睇吓先，等我數一數吓，係F音。」
我說：「低音譜號喎。」
同學說：「哎呀，睇漏眼，以為高音譜號，等我數一數吓，係A音。」
我說：「喂，好慢呀，同上次見你差唔多，平時有冇練架？」
同學說：「練咩？」
我說：「練睇譜，學音樂，譜日日都要睇架啦。」
同學說：「睇睇吓停咗。」
我說：「節奏呢？上次我介紹咗Rhythm Trainer俾你，有冇玩呀？」
同學說：「咩Rhythm Trainer？」
我拿出手機。
我說：「呢個呀。」
同學說：「哦。」
我說：「有冇玩？每日15分鐘。」
同學說：「玩玩吓停咗。」
我說：「咁有冇練琴？」
同學說：「有，不過練黎練去都冇乜起色。」
我說：「每日練幾耐？」
同學說：「我冇心機日日練呀，你日日練琴架？」
我說：「梗係。」
同學說：「都唔知要練到幾時先有進步？」
我說：「幾時進步呢科嘢，唔輪到我哋控制嗰喎，幾時練習就係我哋控制啦。」
同學說：「我諗住總共俾三年時間自己，如果都仲係冇乜起色呢，就唔學啦。」
我說：「咁你最快都要去到2025年4月28號先好唔學。」
同學說：「點解？我讀咗差唔多已經一年嗰囉喎。」
我說：「你而家咩都停晒，睇譜又停，數節奏又停，彈琴又停。我當你今日2022年4月28號重新開始，3年後，最快咪就係2025年4月28號囉！」
同學大笑。
侍應送上食物。
同學說：「我哋一齊祈禱。」
我說：「祈咩禱呀？想求主幫你，咩都停練就三年內突飛猛進呀？定係唔想行，想搭飛機出埃及呀？呢啲禱你自己祈飽佢，我唔祈呢啲。」
同學大笑。
同學說：「一齊祈禱謝飯咋。」
我說：「咁就差唔多。」
…….
另一個我說：「駛唔駛咁刻薄呀你？落晒閘！代個禱駛死咩？」
我說：「盲咗呀你？我咪有一齊祈禱謝飯囉。」
另一個我說：「就算嗰同學，開口叫你代求音樂進步呀，講兩句好聽少少嘅禱告都唔怕啦？」
我說：「主喺唔會應允呢個禱告。」
另一個我說：「你憑乜嘢代主回應禱告呀？你以為自己係主呀？喺度孤假虎威，收啦！」
我說：「主已經俾咗答案佢啦。」
另一個我說：「答案？喺邊呀？」
我說：「佢乜練習都停晒，而家咩下場呀？」
另一個我說：「停滯不前…..哦，我明啦，咁即係唔駛代禱啦，你呢個偽基督徒，又得佢自生自滅囉！」
我說：「我而家就幫佢代禱。」
另一個我說：「你代禱仲有咩好講？」
我說：「我禱告求主帶領佢立刻改變自己，即日恢復練習。」
發表新回應