本週反思#217💬

「主何時愛你❓」

一早。

……

01/03/2022（二）09:00 家

我準備出門口。

爸爸說：「喂，咪行住。」

我說：「做咩？」

爸爸說：「我覺得嗰頭好痛。」

我說：「嗰頭好痛？」

媽媽說：「駛唔駛睇醫生？」

爸爸說：「要呀。」

我說：「上聯合？」

爸爸說：「而家上急症，痛死都未有得睇。」

媽媽說：「阿仔，你打去睇吓觀塘邊間診所有得睇啦？」

我說：「好。」

我打了數個觀塘區的診所電話。

媽媽說：「點呀？」

我說：「一係就淨係得打針冇得睇症，有得睇症嘅就全部都要預約。」

媽媽說：「咁預約啦。」

我說：「但係預約Full晒。」

媽媽說：「直係死得，咁我落街睇下可唔可以直接攞到籌。」

我說：「好呀。我繼續打電話。」

……

我禱告。

另一個我說：「去Signal。」

我說：「做乜鬼仲去Signal？」

另一個我說：「入去《清風》。」

我說：「高中同學嗰個群組？」

另一個我說：「係呀。」

我說：「嗰度有醫生睇呀？」

另一個我說：「冇醫生，但係尋日有同學分享咗一份COVID-19應對天書，打開去睇吓。」

我說：「是但啦，事急馬行田。」

我打開COVID-19應對天書。

另一個我說：「睇到啲咩？」

我說：「有好多門診電話。」

另一個我說：「揀間電話打。」

我說：「咁藍田分科診所普通科門診診所。」

我致電藍田分科診所普通科門診診所，竟然出現全日唯一的檔期，一剔成功預約。

……

01/03/2022（二）09:30 家

媽媽回來。

媽媽說：「冇醫生睇呀。」

我說：「老豆，起身。」

爸爸說：「約到呀？」

我說：「係。」

媽媽說：「約到？」

我說：「係。」

爸爸說：「約到去邊度睇？」

我說：「藍田分科診所普通科門診診所。」

爸爸說：「睇幾點？」

我說：「10點半，仲有一個鐘，即刻執嘢行差唔多，要早15分鐘登記報到。」

媽媽說：「咩話？呢個環境仲約到醫生睇？」

我說：「正常冇。」

媽媽說：「正常冇，咁又有嘅？」

我說：「一定係主呀。你睇吓主幾愛你，呢個10點半嘅檔期，一定係主一早預留俾你架。」

爸爸看著我。

爸爸說：「咁你而家去邊？」

我說：「梗係陪你搭車過去藍田普通科門診啦，仲唔執嘢行？」