「傳福音，報喜訊，是愛，還是責任❓」
是滿有愛才願意承擔的責任。
......
31/03/2021 (三）11:05 晚青佈道團佈道及活動WhatsApp群組
弟兄上傳一張截圖。
另一個我說：「喂，去睇吓。」
我說：「八卦。」
另一個我說：「你短宣中心晚青課程嘅同學寫架。」
我說：「咁睇吓啦。」
另一個我說：「佢做邊行？」
我說：「四大會計師行嘅審計員。」
另一個我說：「審計員，周街去傳福音？」
我說：「有咩問題？」
另一個我說：「審計員，對數字嗰喎，邊識講嘢架？」
我說：「佢而家去宣咗教一年，日日周街同人講福音呀！」
另一個我說：「三唔識七，如果係我，都唔知點算好呀？」
我說：「佢都寫話自己拙口笨舌架。」
另一個我說：「唉，死得。」
我說：「但係傳傳吓，有人問佢係咪推銷員。」
另一個我說：「嘩，神顯靈。」
我說：「透過短宣中心訓練呀！」
另一個我說：「咪住，你啱啱係咪話佢宣咗教一年，日日周街同人講福音？」
我說：「係呀。」
另一個我說：「咁份工呢？」
我說：「辭咗囉。」
另一個我說：「辭工去傳福音？」
我說：「係呀，使徒行傳1章8節話，基督徒要將福音傳到地極嗰喎，係神交托嘅重責，係大使命。」
另一個我說：「一年人工呀！仲要係四大會計師行審計員嘅一年人工呀！份工仲要之後唔知搵唔搵得番！呢個責任，點承擔呀？」
我說：「佢愛神多過錢，咪承擔到呢個責任囉。」
另一個我說：「總之辭工，我就唔得啦。」
我說：「有心傳，總有方法嘅。」
另一我說：「有咩方法呀？」
我說：「唔辭工傳，咪番工傳囉。」
另一個我說：「唔得。」
我說：「咁番屋企傳啦。」
另一個我說：「唔得。」
我說：「咁同朋友傳啦。」
另一個我說：「唔得。」
我說：「咁同同學傳啦。」
另一個我說：「唔得。」
我說：「唉，咁求其是但搵個人，用你接受到嘅方法傳啦。」
另一個我說：「唔得，唔得，唔得。我嘅難處，你有所不知啦。」
我說：「你唔好講。」
另一個我說：「我唔講，你點知姐？」
我說：「知架啦。」
另一個我說：「咁我最大嘅難處係咩呀？」
我說：「你自己囉。」
另一個我說：「........」
發表新回應