「恐懼，如何拒絕沉醉其中❓」
舒發過後，起行尋求主預備的出路。
……
02/08/2024（六）10:49 WhatsApp
HKU Space的同事傳來訊息。
同事說：「葉Sir。」
我說：「係。」
同事說：「有個壞消息。」
我說：「咩壞消息？」
同事說：「下學年班少咗好多，尤其星期六，所以未必有班編到俾Part-time同事。」
我說：「明白，多謝你提早通知我。」
…….
另一個我說：「主有冇病呀？」
我說：「主唔會有病嗰喎，你先會。」
另一個我說：「你而家一闊三大呀，筒筒佢救翻架。」
我說：「係主救番又點呀？」
另一個我說：「咁筒筒嗰個月嗰啲醫藥費，佢要俾架。」
我說：「主救得筒筒就會俾。」
另一個我說：「俾？俾咩呀？而家已經冇要求佢開天窗直接漏啲錢落嚟啦，肯自力更生啦，佢都重要摺埋你HKU份Part Time，真係有病。」
我說：「你就有病，咁發晒癲喺度大叫。」
另一個我說：「我咁癲都係擔心你咋。坐食山崩，你唔驚呀？」
我說：「驚。」
另一個我說：「咪係囉。」
……
06/08/2024（二）14:30
電郵傳來工作面試通知。
……
06/08/2024（二）17:00 救世軍大埔青年綜合服務
面試室
一輪問答過後…….
職員說：「葉Sir，你9月7號可唔可以開始教？」
我說：「可以。」
職員說：「咁不如而家簽埋約啦。」
我說：「吓，咁快？」
職員說：「我覺得你適合，你時間又啱到，咪簽約囉。」
我說：「哦。」
職員說：「其實我呢幾個月已經見咗成20個人有多啦，都搵唔到一個適合，但係又唔想求其搵個人教。」
我說：「哦，多謝你俾機會我。」
職員說：「我決定四班俾你教晒。」
我說：「吓？但係我第一次喺你中心教咋喎。」
職員說：「冇問題，我覺得你適合呀嘛。」
我說：「多謝，咁9月7號見啦。」
…….
另一個我說：「咁怪之得你唔驚啦。」
我說：「我咪講咗話我驚囉。」
另一個我說：「仲扮嘢？原來一早搵定工去見。」
我說：「實請架？」
另一個我說：「你聽唔到呀？嗰職員話呢幾個月見咗成20個人有多，都搵唔到一個適合呀。」
我說：「聽到。」
另一個我說：「而家佢一見你就即刻簽約啦，仲驚？」
我說：「簽咗約梗係唔驚啦，未簽約咪好驚囉。」
另一個我說：「驚，你唔好似我咁向主大叫？」
我說：「你咪幫我叫咗囉，舒發完仲唔出發去搵主預備咗俾我嘅出路呀？」
另一個我說：「你又知主預備咗出路俾你？」
我說：「我信主喺生命嘅主囉，佢話會一直帶領我架嘛，你唔信呀？」
另一個我說：「我信。」
我說：「信你又淨係顧住喺度大叫，叫完都唔起行尋求主預備嘅出路？」
發表新回應