「門外漢，如何入門❓」
主指一步，我行一步。
……
18/07/2024（四）1500 WhatsApp
我和單簧管樂手討論我支單簧管的問題。
我說：「我支單簧管唔係好惦。」
樂手說：「邊度唔惦？」
我說：「G#同Bb啲聲好怪。」
樂手說：「呢度係Throat Tone區域，連續高速吹要保持良好音色，係好難架。」
我說：「我而家慢吹一個音，個音都好怪喎。」
樂手說：「咁唔係你唔夠氣，就係你支笛有問題。」
我說：「不如我拍條片俾你睇下。」
樂手說：「好。」
我拍了一條吹G#和Bb的短片。
我說：「你睇下。」
樂手說：「睇唔出邊個問題添。」
我說：「咁呀，不如……」
樂手說：「咁不如我過黎你Studio，現場Check下你支笛。」
我說：「唔好，而家係我支笛有問題，點會係要你過黎呢？」
樂手說：「我約咗人星期六6點喺觀塘食晚飯，順路3點過嚟幫你睇。」
我說：「咁拜托晒。」
......
20/07/2024（六）1500 Band房
樂手說：「你支笛好多問題喎。」
我說：「咩問題？」
樂手說：「啲pad溶咗、有幾個Key走咗位，Key面花晒，有啲Key又鬆、水松木又蝕……」
我說：「咁有冇得整？」
樂手說：「有。」
我說：「幾多錢？」
樂手說：「要師傅再詳細睇過支笛先知，不過唔會平。」
我說：「咁你估大概幾多錢？」
樂手說：「最少$2,000。」
我說：「嘩，支笛人地送俾我，佢話支笛都係$6000左右咋喎。」
樂手說：「但係支笛好舊呢，睇落又冇保養。」
我說：「點保養？」
樂手說：「再教你。你係咪諗住係咁二吹下架咋？」
我說：「唔係。我諗住最少考到八級先收手。」
樂手說：「咁買過支笛啦。」
我說：「我都有咁諗。」
樂手說：「記住試笛。」
我說：「吓，點試？」
樂手說：「唉，咁不如我同你去尖沙咀通利試啦，睇啱順手買埋。」
我說：「好呀。我下個禮拜二，中午12點離開演藝，不過你要番工喎……」
樂手說：「咁不如就下禮拜二中午12點演藝等。」
我說：「你得閒咩？」
樂手說：「我打自己工，時間可以好彈性，同埋我都想參觀一下演藝。」
我說：「咁好呀，就下個禮拜二，中午12點演藝等，參觀完就過通利試笛。」
……
另一個我說：「你有冇再廢啲呀？」
我說：「你講邊個廢呀？」
另一個我說：「聾架，你呀！仲話自己係作曲，一枝單簧管就玩謝你，講到尾你都係門外漢。音樂呢科嘢，你識條鐵咩？」
我說：「我就係知自己係門外漢，所以先請教樂手。」
另一個我說：「死淨面皮幾尺厚。」
我說：「多謝。」
另一個我說：「唔係讚緊你呀。你啲咁屎嘅作曲，邊個肯同你埋堆？」
我說：「而家睇唔起我嗰個好似係你咋喎。」
另一個我說：「接受到你廢，都唔係專登走過嚟你Studio幫你檢查支笛呀？」
我說：「佢話順路呀，你聾架？」
另一個我說：「咁啱佢又順路？」
我說：「你問我有鬼用呀？」
另一個我說：「我當順路係咁啱，打自己工抽到時間幫你試笛，唔係咁橋呀嘛？」
我說：「我同人打工，仲要自身都難保，你認為我識教佢創業咩？」
另一個我說：「你條門外漢，咁啱你又唔知，咁橋你又唔識，耍我呀？」
我說：「咁你係咪好想知點解呀？」
另一個我說：「係。」
我說：「咁你打電話問我樂手啦。」
另一個我說：「唔問，我都唔識佢。」
我說：「咁你祈禱問主啦。」
另一個我說：「唔問，我都唔信佢。」
我說：「你永世都唔會明白，我呢個門外漢點樣入門。」
另一個我說：「點解呀？」
我說：「人你又唔問，主你又唔信，又怕羞又多疑，主派人教路又好，就算親自引路都好，你會跟咩？」
發表新回應