「今天的挫敗，是主一直不支持❓」
也可能是，我一直走數的合理結果。
……
26/02/2024（一）1200 日本文化協會
老師說：「じゃ、ここまでです。何か質問がありますか。」（到呢度，有冇問題？）
我收拾行裝。
老師說：「ヨウさん。」（葉同學）
我說：「はい、先生。」（係，老師）
老師說：「今出る？」（而家走啦。」
我說：「はい､１時に音楽理論課があるから､ちょっと失礼します。」（係呀，1點上音樂理論，唔好意思，走先。）
老師說：「わかった。じゃ､また来週ね。」（明白，咁下個禮拜見。）
我說：「はい､また来週。」（好，下個禮拜見。）
…….
另一個我說：「陰公囉。」
我說：「陰咩公？」
另一個我說：「幾廿歲人仲要趕黎趕去。」
我說：「唔陰公。冇人迫我，我自己揀嘅，我想四年後作曲日文齊齊畢業。」
另一個我說：「講就咁講啫。你幾廿歲人，咁樣舟車勞頓法。主如果係有心支持你嘅，一早
就要支持你讀日文啦，睇見你就陰公。」
我說：「我唔陰公，主一直有支持我。」
另一個我說：「如果主一直有支持你嘅話，你會攪到2024年啲日文仲係半桶水咩？你2005年9月開始讀架啦，主支持嘅，你博士都攞埋番黎啦，真係陰公。」
我說：「我唔陰公，主一直有支持我。」
另一個我說：「你真係癡鬼線，好似啲壞咗錄音機咁，不停重覆話主一直支持你。主點一直支持你讀日文？講呀！」
我說：「2005年7月，嗰陣我阿媽喺深水埗做時裝批發，成日要接待啲日本客，知道日本人幾乎淨係識日文，再諗到我第時可能有機會同日本人交流合作。主藉此派阿媽鼓勵我讀日文。」
另一個我說：「鼓勵又點？」
我說：「咁我咪報咗日本文化協會05秋入門課程。」
另一個我說：「咁主頂多都係一開始支持你啫。」
我說：「唔止，我讀完秋入門，普通一年，普通二年之後，覺得日文識睇唔識講，主再支持我。」
另一個我說：「主之後仲點支持你咩？」
我說：「主俾半年時間同學費，我去東大日本語讀咗半年。」
另一個我說：「喺咁多啦？」
我說：「仲有，主仲俾多三個月時間同學費，2010年送我去大阪關西外語專門學校讀多三個月，再考埋日本語能力試N2。」
另一個我說：「大阪都去埋，咁你而家仲讀咩？」
我說：「N2。」
另一個我說：「考到N2，仲讀N2？」
我說：「其實只係僅僅合格，我一直hea讀，根本冇N2程度。冇心機逐步追，放棄咗，咁就丟低咗日文13年。」
另一個我說：「擺低13年，仲點重新再讀？」
我說：「主創造時機，送我入演藝，全職讀書多番啲時間。」
另一個我說：「時間我夠有囉，唔代表我會重讀囉？」
我說：「主激活番我對日文嘅追求。」
另一個我說：「點激活？」
我說：「透過音樂囉。日本好多好好嘅音樂作品，好想直接睇得明樂譜以外嘅日文描述，仔細研究再創作。演藝面試嗰陣，仲派老師鼓勵我再讀。」
另一個我說：「跟住你就報讀啦？」
我說：「主仲幫我安排時間，夾埋演藝番學同埋大學教書時間表，帶我番日本文化協會由普通二年A班第三學期開始再讀。」
另一個我說：「咁你呢次諗住讀日文讀到幾時？」
我說：「最少四年，普通三年、研究一年、研究二年、研究綜合，考埋N1，同演藝作曲一齊畢業。」
另一個我說：「嘩，仲要咁樣舟車勞頓四年，你畢業嗰陣都老鴨鴨啦，真係冇陰公。」
我說：「吓？咪已經講得好清楚，係我咁多年一直走數，冇持續俾心機時間讀好日文，先至攪到今時今日都仲係半桶水，仲冇陰公？」
另一個我說：「唔係冇陰公，應該係咩？」
我說：「抵死囉，仲有感恩。」
另一個我說：「抵死都仲感恩？癡咗線呀你？」
我說：「主事隔18年，仍然繼續全力支持我去讀好日文喎，我就好感恩啦，你唔咩？」
發表新回應