「如何視主為一家人❓」
不惜代價，去愛。
…….
04/06/2024（二）1600
作曲課
我打開電腦之際…..
老師說：「你隻貓點呀？」
我說：「三個禮拜後再覆診。」
老師說：「去邊度覆診？」
我說：「心臟專科。」
老師說：「覆診睇咩？」
我說：「仲試緊藥，醫生希望搵到最少劑量嘅藥，控制到嗰心臟病。劑量越少，對貓貓其他器官嘅負荷越細。」
老師說：「哦……嘩，咁試法，都應該洗你唔少錢。」
我說：「係呀，原本諗住暑假休息下，而家要積極搵工。」
老師說：「到而家為止，洗咗幾多錢…….第一間醫院？」
我說：「大約$6000。」
老師說：「第二間醫院？」
我說：「大約$30,000。」
老師說：「第一次專科？」
我說：「大約$10,000。」
老師說：「專科覆診？」
我說：「大約$7,000。」
老師說：「咁都好溶…..仲要覆診，長期食藥。」
我說：「搵工啦。」
老師說：「搵啦，都要俾架啦。」
我說：「嘿！如果係你，你都會俾呀？」
老師說：「會。」
我說：「你俾過？」
老師說：「我屋企貓多過人，你話呢？」
我說：「點解肯俾嘅？」
老師說：「屋企人黎架嘛，除非你唔當啲貓係你屋企人啦。」
…….
另一個我說：「你暑假要番工搵錢？」
我說：「梗係要。」
另一個我說：「你暑假仲作唔作曲？」
我說：「作，作曲唔會停，我作曲黎架。」
另一個我說：「你暑假仲練唔練單簧管？」
我說：「練，作曲不離演奏，我仲想考五級。」
另一個我說：「你又番工，又作曲，又練管，咁你要搵個位休息一下啦。」
我說：「邊度有位？」
另一個我說：「你停筆啦。」
我說：「我停筆？」
另一個我說：「你停筆唔好再寫本週反思啦。」
我說：「唔停…我自己會搵第二個位休息。」
另一個我說：「點解？」
我說：「我要抽時間俾主，講佢日日喺我身上嘅作為。」
另一個我說：「咁忙，都仲要抽時間俾主？」
我說：「要。」
另一個我說：「你抽過時間俾主啦？」
我說：「我嗰個禮拜啲分享，字多個圖，你話呢？」
另一個我說：「點解咁忙都仲肯抽時間俾主？」
我說：「屋企人黎架嘛，除非你唔當主係你屋企人啦。」
發表新回應