「已隨主踏前一步，為何生命仍不見顯著改變❓」
可能一直都未清楚或接受，跟隨主改變生命，是要付上龐大的代價。
……
10/12/2023（日）12:00 家
學生說：「我覺得自己努力咗好多，英文都冇乜進步咁。」
我說：「我覺得你一直進步緊喎。你開頭英文字都讀唔到，而家讀到文章；寫句句子都唔惦，而家寫得惦。」
學生說：「同我心目中差好遠。」
我說：「你想進步到咩地步？」
學生說：「我想作到好嘅文，翻譯到，講到流利嘅英文。」
我說：「你跟我學咗幾耐？」
學生說：「一年零兩個月啦。」
我說：「但係你一個禮拜上一堂，每堂一個鐘咋喎，有時仲請吓假添。」
學生說：「但係我有做功課。」
我說：「等等，我睇睇先，你做咗中譯英55篇，句法練習65個。」
學生說：「嘩，你點計架？」
我說：「我要求你用電腦交功課架嘛，我每個私人學生都有個folder，一㩒制就知你咁耐以黎做過啲咩啦。」
學生說：「咁我都付出咗好多啦。」
我說：「係有付出，但係唔算好多啫。」
學生說：「咁都唔多？」
我說：「真係唔係好多咋。」
學生說：「可以有幾多？」
我說：「好似呢個三個仔女嘅媽媽，跟我學咗6年，極少請假，程度仲要高過你。英譯中做咗243篇，中譯英做咗188篇，句法練習532個。」
學生說：「咁你自己呢？」
我說：「中小學唔計，淨係大學。翻譯學士全時間讀嗰三年，日日譯。碩士嗰兼讀嗰兩年，都隔兩日就譯。執教呢十幾年，一有學生翻譯，我就重譯俾佢參考。」
學生說：「唉。」
我說：「你努力咗一年都算唔錯架啦，只係唔清楚要達到你心目中嘅目標，係要負上幾大付價啫，俾啲心機耐性繼續努力多三、五、七年，一定有成果。」
……
另一個我說：「唉。」
我說：「唉咩呀？」
另一個我說：「音樂方面，你想有咩顯著改變？」
我說：「我想成為全方位作曲，專業嗰隻。」
另一個我說：「咁你努力多三、五、七年。」
我說：「我預備好架啦，打算至少喺演藝完成四年學士。」
另一個我說：「至少？咁四年之後呢？」
我說：「主俾機會我嘅，繼續讀又得，做相關工作攞經驗又得。」
另一個我說：「唉。」
我說：「又唉咩呀？」
另一個我說：「我嘅生命都想有顯著改變。」
我說：「好呀，支持。」
另一個我說：「我已經跟隨主踏出咗第一步，但係咁多年嚟生命咩都冇變過。」
我說：「你踏出嘅第一步係咩？」
另一個我說：「我領咗洗啦。」
我說：「咁第二步呢？」
另一個我說：「仲第二步？你知唔知我花咗幾多心力先踏得出呢一步？我已經盡晒力，冇力啦。」
我說：「你完全唔清楚或者唔接受跟隨主轉變生命，係要負上幾大付價。」
另一個我說：「我唔清楚唔接受？你知唔知我浸咗幾多年呀？」
我說：「你三、五、七年之內都唔好再搵我。」
另一個我說：「點解呀？」
我說：「你領咗洗咁耐跟主行多步都話冇力嘅，我睇你三、五、七年內都唔會有咩結果，冇結果嘅嘢我唔想傾，係咁。」
發表新回應