「不知我需要的人，會供應我所需要嗎❓」
會，因為供應我所需的源頭，並非不知我所需的人，而是深知我需的主。
……
19/07/2023（三）22:00 地鐵屯馬線
突然，有人從後走近。
學生說：「葉sir。」
我說：「Hello，咁啱嘅。」
學生說：「係呀，我都係搭屯馬線番屋企。」
我說：「原來係咁。」
學生說：「葉sir，你正職係咪教大專英文？」
我說：「係呀。不過暑假教埋你哋社工呢一轉，九月就唔係。」
學生說：「九月你做乜？」
我說：「我全職讀音樂。」
學生說：「嘩，完全睇唔出你識音樂喎。你九月喺邊度讀？」
我說：「香港演藝學院。」
學生說：「讀邊個音樂課程？」
我說：「作曲及電子音樂學士。」
學生說：「讀幾耐？」
我說：「全職四年。」
學生說：「咁你呢四年嘅學費同生活費攪惦晒啦？」
我說：「哈哈，未呀，其實開咗學都要搵兼職教下。」
學生說：「搵到未？」
我說：「未呀。」
學生說：「咁我有份工介紹俾你。」
我說：「呀！咩工？」
學生說：「教社工英文，高級文憑課程。」
我說：「幾時？」
學生說：「平日夜晚。」
我說：「邊間院校？」
學生說：「我公司，香港中華基督教青年會（YMCA）。」
我說：「OK喎。」
學生說：「WhatsApp嗰招聘PDF俾你。」
我說：「好呀，非常感激。」
學生說：「7月25號截止申請啦。」
我說：「今晚申請。」
……
另一個我說：「邊度黎嘅學生？」
我說：「港專。」
另一個我說：「港專？你幾時開始教？」
我說：「我7月3號先開始教。」
另一個我說：「教咗兩個禮拜咋喎，你同嗰學生好熟架？」
我說：「咪識咗兩個禮拜囉。」
另一個我說：「識咗兩個禮拜，嗰學生就自己衝過黎介紹份教席俾你？」
我說：「盲架？仲問？有咩咁出奇？」
另一個我說：「梗係出奇，三唔識七，佢點知你九月全職讀書？佢點知你需要兼職教席搵學費生活費呀？」
我說：「一啲都唔出奇，因為第一個想介紹份教席俾我嘅，都唔係呢個唔知我需要嘅學生，而係深知我需要嘅主。」
發表新回應