「走主引領的路，如何專注❓」
與目標無關的，一概不理。
……
17/08/2023（四）10:50 香港演藝學院行政樓
學生註冊處
職員說：「先生，你做咩呀？」
我說：「我黎做學生註冊嘅。」
職員說：「吓？」
我說：「約咗11點10分，早咗到。」
職員說：「你叫咩名？」
我說：「我叫葉偉雄。」
職員說：「哦，葉同學，之前Email聯絡過嘅。」
我說：「係呀。」
職員說：「你攞啲學歷證明出嚟。」
我說：「好。」
一會兒後…
職員說：「咁註冊完成架啦。麻煩你而家去學生服務中心報到，填幾份Form。」
我說：「學生服務中心點去？」
職員說：「好簡單，出門口，轉右；行到盡頭，開門，再轉右直行就見到架啦。」
我說：「唔該晒。」
……
17/08/2023（四）11:10 香港演藝學院學生服務中心
我推開門。
職員說：「搵嗰位坐。」
我說：「好。」
職員說：「同學，掃呢兩個QR Code填兩份Form，填完會見到「謝謝」兩隻字，再Show俾我睇一睇，唔該。」
一會兒後…
我說：「填完啦，麻煩你睇睇。」
職員說：「OK。牆上面有3個QR Code。左手邊嗰個俾Part-time學生申請，右手邊嗰兩個俾Full-time學生申請，咁你掃左手邊嗰個啦。」
我說：「但係我Full-time學生嚟嗰喎。」
職員說：「哦……咁你掃右手嗰兩個啦。」
我掃完QR Code，返回座位之際，一個女士走近，指著我旁邊嘅空位。
女士說：「哥哥，坐呢度填表呀。」
我轉右看看，看見一個貌似中學畢業嘅男生。當我正轉左返回手機屏幕之際，發現對面坐著一個二十出頭外國少女看著我。
我繼續填表。
……
完成後，我走向破璃門。
另一個我說：「港鐵學生乘車優惠呀！全職學生，申請啦。」
我說：「正。」
我打開相機，掃一掃QR code，開始填表。填完按鍵遞交之際，手機版面出現一行紅色字：「申請人年齡必須介乎16-25歲之間」。
我看看職員。
我說：「唔好意思，想確認一下，港鐵學生乘車優惠，25歲以上嘅全職學生係咪唔合資格？」
職員說：「係呀。25歲，你過咗啦，係咪呀？」
我說：「過咗好耐。」
職員說：「唔好意思，咁唔合資格架啦。」
……
另一個我說：「好樣衰呀你。」
我說：「邊度樣衰呀？」
另一個我說：「好老呀你，仲扮後世。」
我說：「我冇扮後生。」
另一個我說：「仲話冇扮？畢咗業N年，仲以為自己係十八廿二呀你？」
我說：「我冇諗過自己仲係十八廿二。」
另一個我說：「幾廿歲人去做全職學生，註冊嘅以為你白撞，學生服務中心就以為你業餘兼職讀，連港鐵都頂你唔順，唔俾你申請學生乘車優惠呀。」
我說：「唔俾咪唔俾囉，咁又點啫？」
另一個我說：「咁咪超樣衰囉。都唔知主攪乜，點條咁嘅黑路俾你行，面目無光，只有樣衰。」
我說：「你想要塊面貼啲咩光上去呀？」
另一個我說：「我唔係一定要萬人景仰咁光彩，但係唔係要你呢件老嘢入遊樂場咁滑稽、咁尷尬、咁樣衰囉。」
我說：「呢啲嘢我唔理嗰喎。」
另一個我說：「演藝啲人點睇你，你唔理呀？」
我說：「唔理。」
另一個我說：「連你自己嘅感覺，都唔理呀？」
我說：「唔理。」
另一個我說：「咁你理乜嘢？」
我說：「我理作曲囉，主帶我入演藝學作曲呀。你理咁多其他無關痛癢嘅嘢做乜嘢？」
另一個我說：「……」
……
17/08/2023（四）11:35 香港演藝學院學生服務中心
我準備離開，看看櫃枱。
我說：「枱面啲紀念品係咪攞得架？」
職員說：「隨便揀。」
發表新回應