「主的精準預備，如何領受❓」
放下自我，謙卑求問。
……
30/03/2023（四）13:00 浸大教職員休息室
我開門，看見英文組的同事。
我說：「早晨。」
同事說：「早晨。」
我說：「差唔多收爐。」
同事說：「呢檔係。」
我說：「吓，你仲有第二檔咩？」
同事說：「有呀。呢檔收，另一檔開。」
我說：「辛苦你啦。」
同事說：「兼職講師係咁架啦，手停口停，特別暑假。」
我說：「咁又係。」
…….
01/04/2023（六）07:24 WhatsApp
我打開浸大同事的WhatsApp。
另一個我說：「你做乜？」
我說：「搵同事幫手。」
另一個我說：「幫咩手？」
我說：「幫手睇下份暑期教職介紹俾我囉。」
另一個我說：「唔得。」
我說：「點解？」
另一個我說：「咁佢咪知道你暑假量地囉。」
我說：「我五月開始就量地啦，俾佢知道又點？」
另一個我說：「樣衰。」
我說：「仲顧住嗰樣？今時唔同往日啦，我N咁多樣洗費，又家用，又貓狗，又band房，又讀書，如果全職讀音樂仲死，而家主派同事話我知佢暑假有得撈，呢個可能係主準備俾我嘅搵錢機會，我係絕對唔會放過。」
另一個我說：「你咪亂黎，你唔要面我要…」
……
我說：「早晨，其實我搵緊暑假教職，如果你嗰度請人，可以嘅話，介紹一下。」
同事說：「咁啱嘅，我哋學院而家請緊人喎。」
我說：「真係？」
同事說：「等我望下先，你有語文學位啦。」
我說：「梗係有，嶺大翻譯學士。」
同事說：「得…咪住，要教育文憑喎，你有冇？」
我說：「有，香港教育學院教育文憑（中學），主修英文。」
同事說：「得…哎呀，弊，要碩士。」
我說：「我都有，中大翻譯碩士。」
同事說：「咁得晒。」
我說：「太好啦。」
同事說：「send個CV俾我，我幫你遞俾學院。」
我說：「唔該晒。」
……
03/04/2023（一）12:08
電話響起。
對方說：「葉生。」
我說：「我係。」
對方說：「呢度係學院打黎，收到你嘅履歷，想約你面試。4月11號，下晏2點半，你得唔得？」
我說：「得，到時見。」
……
另一個我說：「六合彩呀？」
我說：「咩呀又？」
另一個我說：「有冇咁啱呀？一擊即中？仲要學院要乜你有乜？」
我說：「主嘅預備，係咁精準嗰喎。」
另一個我說：「哦，你一早知道學院要乜嘅，所以就咩面都唔要，死去問你同事啦。」
我說：「喂，你咪倒轉啲嘢黎講啦，我連學院請人都唔知呀。」
另一個我說：「我倒轉啲嘢黎講？」
我說：「我係信主有預備，先至放低面子走去問同事。問完同事先知道學院請人，同埋知道學院需要嘅嘢，原來主一早幫我準備好晒。」
另一個我說：「咪住，如果…」
我說：「如果我信你死要面，係咪等你話我知，下期六合彩開咩呀？」
發表新回應