「主設計的愛，如何運作才完滿❓」
你我互相效力。
…….
01/05/2023（一）08:00 家
我起床走出大廳，看見筒筒整個頭都栽在飯兜之上。
我說：「嘩，筒筒攪咩？」
媽媽說：「開餐囉。」
我說：「食咩呀？成個頭鐘晒落去嘅。」
媽媽說：「濕糧。」
我說：「點解食濕糧？筒筒不嬲食開乾糧。」
媽媽說：「筒筒都消化唔到，成粒嘔番出嚟，瘦咗好多。咁你阿妹就話要試濕糧啦。」
我說：「食咗濕糧好似肥番啲，咁而家筒筒食緊咩濕糧？」
媽媽說：「Forest嘅濕糧。」
我說：「Forest？」
媽媽說：「筒筒食開Forest，其他牌子驚佢唔受得。」
我說：「咁細心嘅，咁食Forest咩味嘅濕糧？」
媽媽說：「雞肉南瓜味。筒筒鍾意食雞，其他味驚佢唔食。」
我說：「嘩，好體貼喎。邊度買？」
媽媽說：「樂高寵物，樓下凱滙嗰商場有得賣。」
我說：「幾多錢一罐？」
媽媽說：「唔平架，一罐$16。一箱$228，24罐，除開一罐$9.5。」
我說：「嘩，超仔細，做足調查喎。」
媽媽說：「梗係。」
我說：「咁一日食幾多罐？」
媽媽說：「一日一罐，分四次食。」
我說：「分四次？」
媽媽說：「筒筒一次食唔到咁多架，三個鐘一次，每次兩羹。」
我說：「咁都幾煩。」
媽媽說：「未算。而家天氣咁熱，開完罐要即刻雪番落雪櫃，唔係會變。三個鐘之後攞出嚟蒸一蒸熱，去咗陣雪氣，唔係食咗肚屙。再攤一攤凍先食得，唔係㷫親嗰咀。」
我說：「駛唔駛咁煩呀？」
媽媽說：「錫隻貓，就係咁架啦。」
我說：「我代筒筒多謝你。」
媽媽說：「梗係，旨意你，筒筒瓜咗啦，你咁鬼忙。」
我說：「再一次多謝你。」
媽媽說：「拿，你嘅。」
我說：「吓？我嘅。」
媽媽說：「濕糧嘅單，找數啦。」
我說：「我找晒佢呀？」
媽媽說：「梗係，你阿妹出計，我出力，你唔駛出錢呀，筒筒老豆？」
……
另一個我說：「攪隻貓，駛唔駛咁大陣仗呀？」
我說：「要。」
另一個我說：「點解要？」
我說：「冇阿妹，根本諗唔到要買濕糧。」
另一個我說：「你冇腦架？」
我說：「嗰腦塞實晒呀。冇阿媽，邊個得閒三個鐘一次，又雪又蒸又攤咁樣黎餵筒筒呀？」
另一個我說：「你冇時間嘅？」
我說：「唔係番工教英文，就係番學番band房研究同埋練習音樂，成日都唔係屋企。」
另一個我說：「你又冇腦，又冇時間，都唔知要你黎做乜？」
我說：「冇我，邊個找數呀？」
另一個我說：「好彩，你仲未全廢。其實攪隻貓，駛唔駛咁勞師動眾呀？」
我說：「要，主設計的愛，你我互相效力，先至完滿架。」
發表新回應