「失去的見證，誰能尋回❓」
主若願意，可以派這個，叫那個。
…….
04/04/2023（二）10:35 香港國際音樂學校辦公室
我按門鈴，主任開門。
主任說：「你咁遲嘅？」
我說：「我唔見咗部電話。」
主任說：「我都估到。」
我說：「你估到？」
主任說：「我9點幾WhatsApp俾你，你都仲應我架。10點之後，你冇晒反應。」
我說：「唉，想死，我部機有我寫嘅分享，成600篇有多，玩完。」
主任打電話，電話一直響，但無人接聽。
主任說：「打得通喎。如果俾人偷咗，應該打唔通先啱架。」
我說：「呀，定位。」
主任說：「定位？」
我說：「我同學幫我攪咗個手機追踪定位。」
我借主任手機，致電同學。
我說：「我啱啱喺3D巴士唔見咗部手機，本來連住AirPod，一落車就失聯，唔知係跌咗定係俾人偷咗。你咪好似幫我整咗個咩手機定位嘅？可唔可以Check下部手機而家喺邊？」
同學說：「OK。喺慈雲山巴士站，而家喺慈雲山商場，行緊去元氣壽司。」
我說：「手機冇腳，點解會識郁架？一定俾人笠咗。」
主任說：「你部咩手機？」
我說：「I-phone 11。」
主任說：「而家都I-phone 14囉，I-phone11咁舊，應該冇人偷架。」
我說：「但係佢識郁喎！」
主任說：「可能有嗰有心人幫你執咗呢？」
我說：「咁有心，你啱啱幫我打俾佢，電話響極佢都唔聽？」
主任說：「你響機定震機？」
我說：「震機。」
主任說：「可能聽唔到。」
我說：「冇啦，嗰600篇文冇啦。」
主任說：「有冇備分？」
我說：「唔知。」
主任說：「咁彈琴啦。」
我說：「吓？仲彈？」
主任說：「唔係可以點呀？就算你而家衝過去元氣壽司，部手機都走咗啦。當佢唔郁，你都唔知部手機喺邊個度啦，唔通你逐個搜身呀？彈啦。」
我說：「彈。」
我彈了一會。
主任說：「喂，你好。」
主任說：「我係手機機主嘅朋友。」
主任說：「我想睇下，點樣可以物歸原主？」
主任說：「哦，好呀。」
主任說：「12點前去慈雲山巴士總站認領番，唔該晒。」
主任掛線。
主任說：「咁而家落堂啦。」
我說：「唔該晒你。」
主任說：「行啦。」
……
另一個我說：「我以為本週反思就咁就摺埋添？」
我說：「咁又唔駛，係冇晒之前嗰啲。不過主復活咗架啦嘛，永生架，只要我一日未死，都可以寫過啲新嘅。」
另一個我說：「咁暫停一段時間都要啦掛？」
我說：「咁就無可避免啦。」
另一個我說：「主點幫你搵得番？」
我說：「搵咗主任、同學、加埋一個有心人幫我。」
另一個我說：「主同時派主任，叫同學，仲搵埋個有心人，Call成三個人幫你一個搵番部手機，攞番上面啲見證番黎，即係主仲想你檔本週反思擺多一陣啦。」
我說：「收到，即刻分享。」
發表新回應