「誰是你的主❓」
你盡快回應的那一位。
……
28/01/2023（六）12:00 家
我執拾行裝……
媽媽說：「12點至4點，師傅上黎裝電視。」
我說：「我知呀，早兩日阿妹通知咗我啦。」
媽媽說：「咁你仲有冇學生黎？」
我說：「冇啦梗係，一收到通知，即刻調走晒啲學生。」
媽媽說：「嘩，你越嚟越似你死鬼大姨丈，好鬼得人驚。」
我說：「佢死咗，我未，有邊忽似佢？有咩咁得人驚呀？」
媽媽說：「當年我喺你死鬼大姨丈度打工嗰陣，佢公司一有問題，就即刻要搵解決方法。」
我說：「成功嘅人係效率高嘅。」
媽媽說：「佢啲效率過晒火。」
我說：「點過火法？」
媽媽說：「佢諗到嗰解決方法，就要啲員工即刻執行。尋晚收工講，聽朝開工就要即刻做。」
我說：「咁有咩問題呀？」
媽媽說：「我同佢講話，等一陣下晏先做。」
我說：「點解朝早開工唔即刻做，係要等到下畫先做？」
媽媽說：「佢就係好似你而家咁當眾質問我啦，一啲面都唔俾。我唔答佢，佢就叫我停晒手上嘅嘢，即刻做。」
我說：「叫得好。」
媽媽說：「嘩，我都話你越黎似似佢，越嚟越得人驚架啦。」
我說：「你就得人驚！都唔知邊個先係你老闆？」
媽媽說：「咩話？」
我說：「老闆開到口叫你做，你無緣無故都仲要拖，唔講以為你先係老闆。」
…….
25/01/2023（三）20:17 Make it Happen WhatsApp Group
Maggie說：「葉Sir，我諗諗吓想今個星期想先上另一條短片：恭喜發財。葉Sir, 如果我聽日俾條片你，你有冇時間上音樂？」
我說：「盡量聽晚做，最遲後晚。」
Maggie說：「冇問題呀。今次係我突然改動，我問題，你按返你時間就可以。」
…….
26/01/2023（四）13:00 浸大教職員室
我吃過三文治，打開電腦，下載Maggie的短片錄音。
另一個我說：「你做乜？」
我說：「混音。」
另一個我說：「唔係今晚先做咩？最遲仲可以聽晚做添，你自己講嘅。」
我說：「而家仲有成45分鐘先上堂喎。」
另一個我說：「癡線呀你，得閒都休息下啦，啱啱先上完兩堂。」
我說：「我都唔累。」
另一個我說：「你番緊工架！」
我說：「我兼職講師黎架，午飯時間呢45分鐘冇人工架，完全可以處理私事。」
另一個我說：「Maggie老幾呀？連休息時間都要攞埋黎幫佢做？」
我說：「我幾時同你講，我幫佢做？」
另一個我說：「Maggie叫你做嗰喎，唔係幫Maggie，幫邊個？」
我說：「主囉。」
另一個我說：「就算係主呀，都唔駛咁急啦。Hea下先，跟原定計劃今晚或者聽晚做咪得囉。」
我說：「點解而家有成45分鐘都唔即刻做，係要等到今晚，甚至聽晚先做？」
另一個我說：「嘩，我都話你越黎似你死鬼大姨丈，越嚟越得人驚架啦。」
我說：「你就得人驚！都唔知邊個先係主？」
另一個我說：「咩話？」
我說：「主派Maggie開口叫到我做，你無緣無故都仲要喺度拖住我，阻住我做，唔講以為你先係主。」
我打開Logic Pro X，混音。
發表新回應