「若信主一直同行保守，你如何回應❓」
走出安舒區。
……
23/04/2022（四）16:00 香港國際音樂學校
實科演奏課
主任說：「你有嗰師姐啱啱入咗演藝喎。」
我說：「嘩，勁！」
主任說：「係呀，讀Master（音樂碩士）。」
我說：「咩系？」
主任說：「演奏系。」
我說：「咩樂器？」
主任說：「Trombone（長號）。」
我說：「演奏系好難入嗰喎。」
主任說：「係呀，你下年都報演藝，得閒同佢交流吓啦。」
我說：「好呀。」
……
23/04/2022（四）22:50 WhatsApp
我說：「你好，我係偉雄，主任嘅鋼琴學生。今日晏晝上實科嗰陣，主任話我知你成功入咗演藝嘅演奏系，恭祝晒。」
同學說：「多謝。」
我說：「其實我下年都諗住報演藝BMus in Composition and Electronic Music（作曲及電子音樂學士），有啲嘢都想請教吓你，得唔得？」
同學說：「無問題。」
我說：「我網上見到今年作曲系嗰報名截止日期係三月中，係咪年年都係咁？」
同學說：「唔係，呢個係延咗期嘅時間嚟。一般黎講，10月開始報名，12月初截止，到時上網check吓。」
我說：「OK。我入學試Aural（視聽）份卷比較擔心啲，你有冇乜嘢方法預備？」
同學說：「MMus（音樂碩士）同BMus（音樂學士）份卷唔同架，真係幫唔到你，你最好都係問番IIM啲老師好啲。」
我說：「OK。MMus第一次同第二次Auditions（試演）係幾時？」
同學說：「MMus第一次Audition就一月，第二次Audition就四月。BMus好似再早啲，一月幾就已經第二次Audition。」
我說：「OK。咁你第二次Audition之後，等咗幾耐先收到Offer（錄取通知）？」
同學說：「我4月21號第二次Audition，6月18號收到Offer，等咗二個月左右啦。」
我說：「收到，唔該晒。下年我作曲發佈會，如果你到時有時間，希望你幫幫我奏。」
同學說：「好呀。」
我說：「多謝晒。」
同學說：「希望幫到你呀。」
……
另一個我說：「死啦，死啦，死啦。」
我說：「死死死，唔死都俾你咒到死。」
另一個我說：「死得啦，而家無啦啦少咗三個月。」
我說：「癡咩線呀？主都冇講過我要早三個月返天家！」
另一個我說：「演藝報名截止日期俾預期少咗3個月呀，上學年延咗期先係3月，一般來講，12月就截止報名，係咪死得呀？」
我說：「咁咪早啲報名囉，邊駛死呀？」
另一個我說：「報名嗰陣，要交埋你作嗰四首曲。」
我說：「嘩，大鑊。10月開學先開始作，12月就要交，點作得切？」
另一個我說：「你話係咪死得？一係問吓學校可唔可以早3個月開始作曲研習導修，暑假7月開始作，1個月作1首，11月作好，仲有1個月混音，12月截止報名之前交，仲趕得切。」
我說：「都好，即刻問吓學校先。」
另一個我說：「咪住，如果學校話唔得咁點呀？」
我說：「第二學年嘅作曲研習，係個人導修，影響唔到其他同學，得掛？」
另一個我說：「好難講，影響唔到同學，影響到老師呢！規矩寫明係10月，學校點解要提早俾你，老馮呀？」
我說：「咁又係……祈下禱先……呀，有辦法。」
另一個我說：「咁快！有咩辦法？」
我說：「萬一學校唔批，搵學校老師私人教，照作。」
另一個我說：「唔得！」
我說：「老師都未講嘢！你有咩資格話唔得？」
另一個我說：「又駛一筆，邊度黎咁多錢？」
我說：「主囉，主6月13號幫我追番3年前幫大學編寫教材嗰筆錢番黎呀嘛。」
另一個我說：「你已經用咗黎預備同報考LMusTCL啦！」
我說：「用咗筆錢一半咋嘛。」
另一個我說：「吓？另一半諗住儲起佢，以備第日不時之需架。」
我說：「今日呢個時候咪有需要囉。」
另一個我說：「筆錢唔係俾你咁洗法！」
我說：「嗰筆數拖咗成三年，主早唔call番嚟，遲唔call番嚟，係要喺我決定咗考演藝之後call番返嚟，擺明係想支持我繼續進修音樂用啦。」
另一個我說：「就算筆錢真係支持你進修音樂，你都唔駛一炮過洗晒佢架？駛一半儲一半，留番啲第時用都得嘅啫。」
我說：「而家主俾我睇到嘅，擺明係要我一炮過洗晒筆錢喺音樂身上，LMusTCL用一半，預備四首曲考演藝用埋另一半。」
另一個我說：「一炮過洗晒佢，之後仲要話全職讀音樂，經濟風險好大。」
我說：「你要咁安全做乜？」
另一個我說：「都係有嗰錢旁下身安全啲好，風險呢啲嘢，少得一分得一分！」
我說：「少少風險都唔冒得？你唔係信主一直同行保守，好安全嘅咩？」
我2022年12月7日（星期三）向香港演藝學院遞交了入學申請。
發表新回應