「主，你真心覺得好嗎❓」
真心覺得好，就立即廣傳。
……
04/10/2022（二）20:30 Cafe Zense
合唱團晚餐聚會，有幸獲副校長參與其中。一輪美食過後，副校長對著一眾同學說話……
副校長說：「阿Yip yip好好。」
我說：「唔？」
副校長說：「阿Yip yip好積極幫學校做宣傳。」
我說：「哦，係呀。」
副校長看一看我。
我說：「我覺得學校好好，所以想介紹學校俾多啲人識。」
……
另一個我說：「好好好，好一個唔知醜嘅音樂學生。」
我說：「我有咩醜要知？」
另一個我說：「副校係咁二讚吓你好啫，你竟然當眾答係，知唔知醜呀你？」
我說：「咁我係好呀嘛。」
另一個我說：「咩咁好？」
我說：「學校有咩活動，我都積極做網上宣傳嗰喎。」
另一個我說：「㩒嗰制咋嘛，咩咁巴閉呀？你有邊日唔㩒手機架？」
我說：「我打電話邀請人去睇Musical喎。」
另一個我說：「都係開句聲啫，咩咁巴閉呀又？你日日都要講嘢架啦，唔講嘢口臭架。」
我說：「我仲親身介紹埋啲對音樂有興趣嘅朋友報名入學添喎，有個而家已經開始讀緊初級證書，有二個報咗合唱團，仲有幾個溝通緊。」
另一個我說：「咁賣力做乜呀？」
我說：「咪講咗話學校好囉，撞聾呀你？你有冇為主喺手機㩒嗰制去傳福音呀？」
另一個我說：「冇，不過主咁好，佢明白體諒我嘅難處嘅。」
我說：「你有冇為主打電話俾人，介紹吓主呀？」
另一個我說：「冇，不過主咁好，佢明白體諒我嘅難處嘅。」
我說：「你有冇為主親身去接觸人，協助佢哋一齊去認識主呀？」
另一個我說：「冇，不過主咁好，佢明白體諒我嘅難處嘅。」
我說：「主係你心目中有得幾好呀？遠遠好唔過你嗰啲難處？衰到死呀你！」
另一個我說：「話我衰到死，我冇做嗰啲，你有做咩？」
我說：「我每個禮拜日都㩒手機傳我寫嗰啲每周反思俾大家；我打電話聯絡身邊人嗰陣，一有機會就講主；時機成熟，我仲邀請埋佢哋加入我哋嗰小組，一齊讀經交流認識主添喎。」
另一個我說：「吹水呀？你講緊邊個呀？」
我說：「嗰個禮拜出YouTube片幫手揀配樂、整影像、上字幕嗰幾個人，都係我㩒手機、打電話、親身接觸邀請番黎架。」
另一個我說：「咁賣力做乜呀你？」
我說：「主好囉。」
另一個我說：「主好，我一早知啦，我都真心覺得主好好。」
我說：「真心覺得主好，咁你仲唔即刻傳？」
發表新回應