「主音，如何聽得見❓」
天天優先收聽。
......
09/11/2020（一）20:15 音樂學校
老師說：「落堂前要Dictation。」
同學呆了。
同學A說：「音樂Dictation？」
老師說：「我跟住會播一段錄音三次，你哋一路聽一路默番晒成條旋律出嚟，總共8個小節，攞嗰五線譜出黎。」
同學B說：「你有冇帶五線譜？」
同學C說：「冇呀。」
老師說：「有邊個冇帶五線譜？」
大半班舉手。
老師說：「究竟係咪音樂學生黎架？音樂學生點可以連五線譜都唔帶？」
老師一人派一張印有五線譜的紙。
老師說：「好，聽第一次，默音長。聽第二次，默音高。聽第三次，最後修正。」
老師播放音樂三次。
老師說：「好，逐個攞出黎俾我睇吓默成點。」
我交出五線譜。
老師說：「嘩，葉偉雄。」
我說：「係。」
老師說：「第三小節開始有Rhythm Shift呀。」
我說：「咩Rhythm Shift？」
老師說：「錯拍子呀。」
我說：「都好，淨係錯拍子。」
老師說：「嗰Pitch都錯呀，點作曲呀？」
我說：「吓？點先聽得準？」
老師說：「你番去日日聽。」
我說：「點聽？」
老師說：「d-d, d-r, d-m, d-f, d-s, d-l, d-t, d-d’, 聽熟嗰C調先啦。」
我說：「點解次次都要聽完嗰d，先可以聽另一個音？」
老師說：「要有嗰Tonic note，即係主音 “d” 黎做基準，再聽其他音，比較一下，先知道同主音差幾多度，咁先分得到啲音，分得到先聽得準。」
......
另一個我說：「我身邊好多人，好多聲音，都唔知聽邊把聲先啱？」
我說：「用主嘅聲音做基準，啲人聲違反主音嘅，就唔駛聽；冇違反主音又合情合理嘅，咪聽吓囉。」
另一個我說：「點用主嘅聲音黎做基準？」
我說：「咁要有主音先得，日日一起身，就聽咗主嘅聲音先，之後再聽其他人講嘢，比較一下，咁咪聽得出有咩分別，同主音差幾遠囉。」
另一個我說：「主都唔講嘢嘅，鬼知主音係點咩？」
我說：「鬼真係知主音係點嗰喎，撒但都認得出耶穌。」
另一個我說：「我次次祈禱，未聽見過主有講嘢，邊度有主音呀？」
我說：「梗係有啦，仲幾時聽都得。」
另一個我說：「邊度有？」
我說：「你試吓上YouTube打「聖經」兩個字，睇下有幾多主音？」
另一個我說：「唉...但係...哎呀...你知唔知...我...」
我說：「我知你有咩難處。」
另一個我說：「知就好啦。」
我說：「我仲知點解，主音，鬼都收得到，你就聽唔見添。」
另一個我說：「點解？」
我說：「你懶過鬼呀！」
發表新回應