「你最喜歡親近誰❓」
捨命拯救我、帶領幫助我的主。
……
04/07/2024（四）0900 華漢茶餐廳
等待早餐之際….
媽媽說：「我同老豆有個新發現。」
我說：「咩新發現？」
媽媽說：「你隻貓，阿筒筒呀……」
我說：「我隻貓，你哋冇份架？」
媽媽說：「總之筒筒有個新舉動啦。」
我說：「咩新舉動？」
媽媽說：「你夜晚一開房門訓覺，佢就例排走入嚟癡住你，跳上你張凳度訓你隔離。」
我說：「咁有咩問題？」
媽媽說：「問題係，佢之前唔係咁架嘛。」
我說：「筒筒之前係點？」
媽媽說：「佢之前寧願癡你老豆，癡我，都唔會癡你。」
我說：「好似係喎。」
媽媽說：「梗係啦，你專做埋嗰啲黑佢憎嘅嘢，刷牙、剪指甲、沖涼、餵藥、出街、洗耳、抹眼……」
我說：「但係呢啲嘢，我而家都仲做緊嗰喎。」
媽媽說：「拿，呢樣嘢就係我同你老豆新發現嘅重點啦。」
我說：「新發現不突止，仲要有重點，講啦。」
媽媽說：「你筒筒之所以180度轉軚，而家晚晚癡你訓，係因為佢知你救咗佢。」
我說：「喂，呢個我同意喎。」
爸爸說：「你醫好筒筒呀？」
我說：「唔係我，係主派好醫生醫好筒筒，但係我都有俾錢，冇工都有勞。」
媽媽說：「我懷疑筒筒知道係你俾錢救佢。」
我說：「唔出奇呀，送筒筒入院係我，接筒筒出院又係我，去專科覆診都係我，筒筒有可能見到我碌卡找數添呀。」
媽媽說：「所以話呢，啲動物好有性。」
…….
另一個我說：「我都有個新發現。」
我說：「咩新發現？」
另一個我說：「你有個新舉動。」
我說：「咩新舉動？」
另一個我說：「你成日講主。」
我說：「係咩？」
另一個我說：「個個禮拜出分享，仲唔係？」
我說：「咁有咩問題？」
另一個我說：「問題係，你之前唔係咁架嘛。」
我說：「我之前係點架？」
另一個我說：「你以前成日講你自己有幾慘，而家成日講主有幾勁。」
我說：「好似係喎。」
另一個我說：「拿，黎緊呢樣嘢就係新發現嘅重點。」
我說：「新發現不突止，仲要有重點，講啦。」
另一個我說：「你之所以180度轉軚，而家成日提住主，係因為你知道主救咗你。」
我說：「喂，呢個我同意喎。」
另一個我說：「不過你讀音樂之後，好似提起主仲頻密咗添呀。」
我說：「梗係，創造到我鍾意音樂嘅係主，送我先入國音再入演藝讀作曲嘅又係主，最重要嘅係，俾方法我搵到錢攻讀音樂，日日陪我練習作曲嘅都係主。」
另一個我說：「所以話呢…咪住，點解主對你特別好架？」
我說：「點會呀？主人人都救，不過你認咗耶穌係你救主，接受咗救恩未？」
另一個我說：「……」
我說：「主人人都帶領幫助，不過你放低咗自己一直緊握住嘅嘢，跟從生命嘅主走出自己嘅安舒區未？」
發表新回應