「我求教，主會教嗎❓」
主一開始就教，你一直受教嗎？
…….
10/10/2022（一）22:59 WhatsApp
某私人學生的家長傳來兩個截圖。
另一個我說：「第一個寫住Reading Skills。」
我說：「即係閱讀技巧。」
另一個我說：「第二個寫住English Language Exam。」
我說：「即係英國語文考試。」
另一個我說：「做乜喺度做英譯中？」
我說：「我翻譯專業黎架嘛，你俾個英文我，唔係就係想我翻譯中文咩？」
家長傳來錄音。
另一個我說：「叻唔切，聽錄音啦。」
……
家長說：「葉Sir，你好呀。啱啱send俾你嘅係，囡囡英文閱讀卷嘅考期，而家距離考試仲有3個禮拜，即係仲有3堂，想睇下葉sir你有冇啲tips俾囡囡可以考好啲份閱讀卷。」
我說：「得番3堂，我冇嘢可以幫到囡囡。」
家長說：「吓？」
我說：「要提升閱讀，有2項基礎技術，第一，字庫。要字庫大，字典要識查，仲要成日查。第二，句法，要老師教，句法書一般人好難睇得明。」
家長說：「明白嘅，所以我咪問吓葉sir你，睇吓你願唔願意幫囡囡。」
我說：「你完全唔明白。你一開始搵我補習，我就建議囡囡要學句法，但係你回覆我話囡囡句子寫得OK，淨係學寫作，記唔記得？」
家長說：「…...記得。」
我說：「記得就好啦，咁你同囡囡傾下。」
家長說：「傾咩？」
我說：「我一開始就講過話囡囡句法唔得，你哋傾吓而家認唔認同，接唔接受？認同接受，決定跟我學句法嘅，就同我講，我調整一下課堂安排。」
家長說：「……」
…….
另一個我說：「佢兩母女真係好慘。」
我說：「慘咩呀慘？」
另一個我說：「人哋唔識先黎搵你啫，而家低聲下氣黎求你教，點知俾你留難一大餐。」
我說：「我幾時有留難佢哋？」
另一個我說：「仲話冇？人哋都話閱讀考試想考好啲囉，你講咁多，教你就教啦。」
我說：「我有話過唔教咩？」
另一個我說：「唉…不過主有時都係咁，祈禱同佢講明唔惦想佢教點做，主都冇直接教嘅。」
我說：「冇可能，主最爽快、最直接、最坦誠，一定教。」
另一個我說：「主邊度有教呀？」
我說：「聖經囉，鋪天蓋地咁教，搵人面對面教，有大班教，有小組教，有一對一教；仲搵人寫書教，有實體書教，有電子書教；仲搵人拍片教，有Youtube教，有Facebook教，有Instagram教；主仲走埋嚟親身教。全天候咁教，你問我主邊度有教？」
另一個我說：「咁惡做乜啫你？我知我係有進步空間嘅，不過……」
我說：「講咁多，一句講晒 - 你究竟受教定唔受教？」
另一個我說：「點受教啫？」
我說：「主動尋求，用心聆聽，坦然接受，跟住…」
另一個我說：「我嗰個禮拜番教會崇拜查經聽到嘅，都放喺內心深處，我唔講，你哋班人冇人知咋嘛。」
我說：「梗係冇人知啦，因為跟住你仲要將你聽到嘅所有嘢，不經篩選，盡全力做晒出嚟，有做晒出嚟嘅，到時就算唔講，都好難有人唔知喎。」
另一個我說：「你最叻留難我！」
我說：「你聽完唔做，或者聽完篩選過先揀一啲黎做嘅，你真心受主教咩？」
另一個我說：「我唔同意你講嘅嘢，我一直都有聽主講嘢嘅。」
我說：「係咪一直都係姑且聽吓主講邊句啱你心水先，跟住用行動教番主轉頭，邊句啱你心水就做，邊句唔啱你心水就唔做咋？」
發表新回應