「求問，如何謙卑❓」
除了用口，還會行動。
……
02/09/2022（五）14:45 都會大學
我說：「睇一睇你今日嘅日程表。」
另一個我說：「做咩？」
我說：「叫你睇就睇啦。」
另一個我說：「睇咗啦。」
我說：「讀出嚟聽吓。」
另一個我說：「10-12pm，HKU Space開會；12-1pm，作曲研習；2-3pm，HKMU 簽約；3-5pm，HKMU 上堂；5:00-5:30pm HKMU 開會；7:30pm 屋企開飯。」
我說：「你5:30-7:30pm之間有2個鐘。」
另一個我說：「係呀，想點？」
我說：「想你6:00-7:00pm去你同學間band房視察吓，順便同佢當面講吓今朝諗到嘅新計劃，遲啲要去佢度練作曲發佈。你而家係荔景，佢係荔枝角，番屋企順路，2個站到。」
另一個我說：「唔得，臨急臨忙，搵邊個騷我？」
我說：「搵你同學囉，聽唔到呀？」
另一個我說：「人哋要教琴架，癡線。」
我說：「你又知今日下晏6:00-7:00pm佢要教琴，佢話你知架？」
另一個我說：「佢冇同我講過嘢。」
我說：「主話你知呀？」
另一個我說：「主都冇我講過。」
我說：「咁得啦。」
另一個我說：「唔得，主都冇話得。」
我說：「主都冇話唔得。」
另一個我說：「我再祈禱問一問主先。」
我說：「你未祈禱主已經知啦，何況我同你啱啱仲講埋出口，主聽咗架啦。」
另一個我說：「但係主聽完冇講嘢喎，即係點呀？」
……
02/09/2022（五）14:55 WhatsApp
我WhatsApp留言給同學。
我說：「我今日下晏5點半喺公大荔景分校放工，想過嚟你Band房睇睇，得唔得？」
同學說：「幾點過到嚟？」
我說：「6點左右。」
同學說：「本來唔得嘅，但係而家得。」
我說：「點解？」
同學說：「本來要係社區中心教琴，但係社區中心突然今日唔開，除消課堂。」
我說：「咁啱？」
同學說：「係呀，平時呢個時間我唔係度架。」
我說：「咁6點見。」
同學說：「6點見。」
……
另一個我說：「你點樣知道主嘅旨意架？」
我說：「我點可能會知道主嘅旨意呀？主都冇講過嘢。」
另一個我說：「主冇講嘢，你唔識開口禱告問？」
我說：「我有開口禱告問，但問完都冇聽見主開口答。」
另一個我說：「主冇開口答過你話得，你仲打電話問你同學得唔得？」
我說：「但係主冇開口答過我話唔得，聖經又冇講過話唔得，咁我咪試行一步，打電話問吓我同學，用行動問下主得唔得？」
另一個我說：「唔係咁做嘢架，你嘥氣嘥力嘥心機。」
我說：「唔係咁點做？」
另一個我說：「主不動，我不動。」
我說：「你唔郁喺度做咩？」
另一個我說：「繼續禱告，直至主郁為止。」
我說：「點解你唔試行一步？」
另一個我說：「我行咗一步，主先話唔係嘅，咁我咪蝕章？開口問咗主先，主話OK，交咗貨俾我先郁，咁就保證賺呀嘛。」
我說：「哦，知啦，原來你先係主。」
另一個我說：「我唔係主，耶穌先係主，我點敢以下犯上。」
我說：「你點會唔敢呀？你啱啱先示範點樣以下犯上，冇大冇細！」
另一個我說：「我冇呀。」
我說：「仲夠膽死話冇？你美其名為禱告，實質就係開口發號施令，行多一步睇吓主點回應都唔肯，廢事蝕章，仲要求主用你嘅方法，回應咗你講嘅嘢，要主交咗貨俾你先肯郁，咁樣都仲話唔係你先係主？你玩晒啦。」
發表新回應