「我睇唔到有，就係冇❓」
主，遠超我眼所見。
…….
24/08/2022（三）15:30
作曲研習導修。
老師說：「呢首嗰個豎琴，最好再Check一 Check。」
我說：「咪Check咗囉。」
老師說：「而家跟書嘅理論去Check啫，只係近似值，搵個彈豎琴嘅再Check一Check，準確啲。」
我說：「我身邊冇人彈豎琴喎。」
老師說：「一個都冇？」
我說：「一個都冇。」
老師說：「咁冇辦法啦。」
…….
26/08/2022（五）09:00 WhatsApp
我跟同學討論作曲發佈會綵排準備問題。
我說：「綵排一定要有midi-keyboard先得。」
同學說：「點解？」
我說：「三首歌，三首都要用。尤其係第三首，我要用midi-keyboard喺電腦度攞豎琴聲，我都冇豎琴。」
同學說：「豎琴，而家同我分租band房嘅朋友係彈豎琴嗰喎，不過佢好忙，未必得閒幫你奏。」
我說：「咩話？你朋友彈豎琴？」
同學說：「係呀。佢好忙，未必得閒幫你奏架。」
我說：「唔緊要，可唔可以叫你朋友幫我睇吓我寫嘅豎琴，俾啲意見呀？呢個唔駛用佢好多時間架咋。」
同學說：「可以幫你問吓佢嘅。」
我說：「太好啦，豎琴手，我以為冇，你竟然有，感謝主。」
同學說：「send份譜過嚟啦。」
我說：「即刻send。」
…….
我說：「我真係唔夠信心，豎琴我冇，冇諗過主有。」
另一個我說：「你都情有可原嘅。」
我說：「情有可原？」
另一個我說：「你睇唔到身邊有人識彈豎琴，咁嘅反應係情有可原，可以理解嘅。」
我說：「但係我嘅反應係，完全冇問過主有冇豎琴喎，咁都仲情有可原，可以理解？」
另一個我說：「睇唔到有，就自然認為冇架啦，係情有可原，可以理解嘅。」
我說：「你不知所謂，難以理解。」
另一個我說：「做乜咁話我呀？我又講錯咗啲乜呀？我幫你講好話咋！睇唔到就係冇架啦。」
我說：「冇？咁主啱啱安排我同學介紹俾我識嗰個豎琴手呢？唔計數呀？」
另一個我說：「我都唔知主有豎琴手，係情有可原，可以理解架。」
我說：「仲夠膽死開口埋口叫主，淨係信自己隻眼，都唔信主。」
另一個我說：「唔係呀，你攪錯咗啦，我信主架。」
我說：「不知所謂，難以理解。」
發表新回應