「主命令，我拖延，不了了之❓」
或會伸手一推，幫我一把。
......
21/12/2020（一）20:00 家
妹妹回家做冬。
妹妹說：「之前係淘寶訂嗰啲嘢到咗啦。」
媽媽說：「拆箱。」
妹妹說：「有Mario衫，皮皮嘅。」
媽媽說：「正呀，紅當當，仲有呢？」
妹妹說：「呢件有帽嘅，筒筒嘅。」
媽媽說：「大咗啲喎，仲有呢？」
妹妹說：「呢件冷衫，皮皮嘅。」
媽媽說：「皮皮大窄啦，筒筒啦，仲有呢？」
妹妹說：「SuperMe，皮皮嘅。」
媽媽說：「呢件型呀。」
妹妹說：「最後，就係筒筒條心口孭帶。」
媽媽說：「阿仔，你話買架。」
我說：「哦。」
媽媽說：「咩筒筒落街行吓啦。」
我說：「而家呀？」
媽媽說：「梗係啦，都食完飯囉，我同你老豆要行吓架啦，夜晚後山又冇咩人，咪拖住皮皮，孭埋筒筒一齊行囉。」
我說：「我唔行，我練琴。」
媽媽說：「行嗰廿分鐘，一陣都行完。」
我說：「老豆拖皮皮，你孭筒筒行咪得啦。」
媽媽說：「我唔孭。」
我說：「你都係順路咋嘛。」
媽媽說：「醫生話我腳痛未好番晒，係唔可以負重行路。」
我說：「筒筒有幾重呀？」
媽媽說：「嘩，筒筒而家嗰肚腩咁大，今時唔同往日。」
我說：「頂多咪三、五、七磅！」
媽媽說：「我唔孭，隻腳係我㗎，我要保護隻腳。」
我說：「阿妹，你行啦。」
妹妹說：「我番咗成日工，行黎行去，腳軟，唔行。」
媽媽說：「筒筒你買嘅，你係佢老豆，你行就行，唔行就罷。」
妹妹說：「咩帶你訂嘅，你係買家，你孭就孭，唔孭就算。」
我說：「......行啦，筒筒。」
妹妹說：「張枱我執。」
......
另一個我說：「今日幾多號？」
我說：「12月21號。」
另一個我說：「你老豆糖尿覆完診醫生話太肥，幾時開始晚飯後上後山行？」
我說：「12月12號。」
另一個我說：「12月12號到21號，過咗幾多日呀？」
我說：「9日。」
另一個我說：「等咗9日啦。」
我說：「等咩呀？」
另一個我說：「老豆有病，都唔陪吓嗰老豆行吓。」
我說：「廢事。」
另一個我說：「叫你去沙頭角呀？樓下後山都廢事，來回都係廿分鐘！」
我說：「神都冇講話要我去？」
另一個我說：「咪講咗囉，以弗所書6章2-3節，要孝敬父母，使你得福，在世長壽。」
我說：「佢地兩個都唔信耶穌！」
另一個我說：「有講過只可孝敬信主嘅父母咩？」
我說：「孝敬都有好多方法，神唔一定係想我同佢哋落街行架？」
另一個我說：「今晚做冬，神搵你自己買嘅筒筒坐定定係度，再派淘寶送埋你自己訂嘅心口孭帶落黎，仲叫埋你阿妹幫手執枱，咁推法都唔係想你陪佢哋落街上後山行廿分鐘？」
發表新回應