「主施憐憫，如何領受❓」
放開手上所有。
……
另一個我說：「聽講你信主嘅其中一個主因，係主施憐憫，修復你一家喎。」
我說：「係呀，主帶番我走咗佬超過十年嘅老豆番屋企。」
另一個我說：「主點帶佢番屋企？」
我說：「一開始，老豆無啦啦自己蒲頭，話要見我同阿妹。」
另一個我說：「幾時嘅事？」
我說：「我初小佢走咗佬之後，高中左右佢就耐唔耐蒲下頭，次次都喺我、阿妹同佢三個人去大新燒臘舖食飯。」
另一個我說：「咁主即係喺你高中嗰陣帶你老豆番屋企？」
我說：「唔係。」
另一個我說：「點解？」
我說：「邊個歡迎佢番黎？全城都指住佢鬧。我阿媽當年同我講話，佢俾我同阿妹見老豆，係因為老豆有權見我哋咋，唔係阿媽原諒佢接納佢番黎。況且我哋嗰陣寄人籬下，住喺大姨媽度，成班親戚個個都話佢衰。」
另一個我說：「咁最終主幾時帶你老豆番黎你屋企？」
我說：「我大學畢業之後一年，2007年。」
另一個我說：「2007年，你冇寄人籬下啦？」
我說：「當年我同大表哥成日嘈，我聽到阿媽講話，佢層樓租約完，要傾續約。我咪話要搬番屋企住囉。」
另一個我說：「咁你老豆呢？」
我說：「我老豆知道我話要搬番去住，佢就話想搬番黎啦。」
另一個我說：「咁你阿媽就接納你老豆搬番黎，一家團聚啦！」
我說：「癡線！我阿媽叫我唔好搬番去呀。佢話，喺大姨度繼續住，免費架嘛，層樓繼續出租，一來一回好多錢架。」
另一個我說：「咁你點回應呀？」
我說：「我話我要搬番去，唔想同我老表住，想接老豆番黎住。」
另一個我說：「你搬番屋企接你老豆番黎，你大姨冇反對咩？」
我說：「佢支唔支持，我都可以搬番去架。」
另一個我說：「咁係咪你阿媽見你咁堅決，最終選擇支持？」
我說：「癡線，層樓佢架，你係業主，會唔會唔收租，開自己層樓度門，迎接自己最憎嘅人番黎住呀？」
另一個我說：「如果我係你阿媽，我會同主講我做唔到囉。咁你阿媽唔支持，你點搬番去？」
我說：「我問佢收緊幾多錢租？」
另一個我說：「問黎做乜？你諗住租佢層樓，搬番去住？」
我說：「嗰陣主俾嗰教席我，我有能力交租，有咩問題？」
另一個我說：「就算你俾錢租，都唔代表你阿媽就要租俾你？」
我說：「我同佢講，如果佢唔租俾我，我就自己搵地方租。」
另一個我說：「最終呢？」
我說：「佢租俾我，咁我咪迎接主引領番黎嘅老豆，一齊番屋企囉。」
另一個我說：「你阿媽呢？」
我說：「佢一齊搬番屋企。」
另一個我說：「嘩，咁領受主施嘅憐憫咪好貴？香港啲租金唔係講笑。」
我說：「咁我阿媽都好好，咁多年都冇加租，我當俾家用姐。」
另一個我說：「家用邊駛屋租咁貴呀？」
我說：「你唔放開手上揸實嗰啲嘢，邊有手領受主施嘅憐憫呀？」
另一個我說：「主邊有施憐憫？」
我說：「失憶呀你？咪講咗話主帶我老豆番黎囉，你有本事叫佢自動自覺番黎咩？」
另一個我說：「好，你啱，主係有施憐憫，不過都係施得嗰一半。另外嗰一半，係要自己埋單呢。」
我說：「唔係，係主埋晒全張單。」
另一個我說：「仲話係主埋晒全張單？而家擺明係，主要你出錢黎填埋另外嗰一半憐憫咋！」
我說：「咩呀？我手上嘅一切，唔係全部都係主嘅咩？」
另一個我說：「呃鬼食豆腐呀你，你不如老實啲話，主施一半憐憫，另一半你自己埋單好過啦。」
我說：「你究竟係咪信耶穌係創造主架？」
發表新回應