「主的耐性，如何領受❓」
若今天的未能做好，就把握明天主賜的機會。
……
15/11/2021（一）19:15 香港國際音樂學校303室
作曲研習 I
導師說：「我想大家運用呢個和弦進行，即刻作一條旋律出來。」
導師說：「兩個bars一個短句，總共作八個bars，四句。」
導師說：「時間係15分鐘，做完即刻交出嚟，一齊研究一下。」
15分鐘過後….
導師說：「時間差唔多啦，交到嘅就即刻交，未交到嘅就下堂前交啦。」
同學陸續遞交。
……
另一個我說：「仲唔交？」
我說：「未作完。」
另一個我說：「仲差幾多？」
我說：「一半，仲有4個bars。」
另一個我說：「仲有成4個bars未作？」
我說：「係呀。」
另一個我說：「做乜咁慢呀今日？」
我說：「今日好累。」
另一個我說：「做乜咁累？」
我說：「尋日朝早查完經，晏晝教書，夜晚同皮皮睇醫生。今朝9點教書教到下晏5點，再過嚟7點上堂，可能唔夠休息。」
另一個我說：「你累還累，但係俾成15分鐘，你連8個bars嘅旋律都作唔到，有冇攪錯呀？仲話第時想作曲，作一首曲唔係淨係寫旋律，仲要排節奏，編和聲，配樂器，混音，一陣間仲要填埋詞，拍埋片，先出到街，你咪不眠不休都攪唔惦？」
我說：「你都識講第時啦，我而家好累呀，用唔到腦。」
另一個我說：「咁唔交呀？」
我說：「交，聽日交。」
另一個我說：「你聽日有時間咩？」
我說：「有呀。聽日教下晏兩點，朝早食完早餐，大約有4個鐘時間。」
另一個我說：「聽日做？聽日俾嗰官你做！」
我說：「你急咩啫？主都未急，仲俾時間我慢慢做。」
另一個我說：「你係做先講，一陣拖到下一堂都未做。」
我說：「我聽朝唔做你先講啦。」
……
15/11/2021（二）09:30 Band房
我打開電腦，開始作曲。
……
15/11/2021（二）10:47 Band房
我完成作曲，把作好的旋律上載給老師。
另一個我說：「好嘢喎，講得出做得到。」
我說：「梗係，主對我咁有耐性。」
另一個我說：「主點有耐性法？」
我說：「你急，主唔急。」
另一個我說：「我幾時急？」
我說：「我話尋日好累聽日做，你話聽日俾嗰官我做。主就同你唔同啦，賜多一朝俾我做。」
另一個我說：「就算主賜多一百朝俾你做，你係要唔做嘅都冇用啦！」
我說：「嘩，主對我咁有耐性再俾機會喎，我尋晚休息好，今朝一回覆精神，就落手做架啦。」
發表新回應