「面對同樣的恐懼，如何不再同樣恐懼呢❓」
求主教導，按指引行動，親手將恐懼連根拔起。
......
26/12/2019（四）油麻地 Urban Cafe 12:00
媽媽、妹妹、Thomas和我一同去Urban Cafe共進午餐，再買罐頭餵貓，貓貓一嗅到罐頭魚的香味，一湧而上，大家餵食時，跟一眾的貓貓互動，不亦樂乎。
26/12/2019（四）太子金魚街竉物店 14:00
正當我們替新買的狗仔皮皮尋找合適的狗帶時，我看見一隻異國短毛貓，顏色白灰混合，個性文靜，五官扁平，非常可愛。
我說：「嘩，隻貓好得意。」
職員說：「抱下佢呀。」
我說：「好呀。」
職員把貓貓交給我。
我說：「貓貓好乖。」
職員說：「係呀。呢隻文靜D，其實有D驚驚青青。」
我說：「岩晒我。又得意，又文靜。」
......
我手抱貓貓，轉身面向媽媽。
我說：「我想買埋呢隻番屋企。」
媽媽說：「嘩，你已經買左皮皮啦，仲買多隻貓？」
我說：「係呀，因為我原本既計劃就係買一隻狗、一隻貓。」
媽媽說：「而家淨係服事皮皮大小二便，已經做死啦。」
我說：「點會？大小便，執起倒落廁格，便盤用水一沖，用毛巾一抹。如果陣味太大，噴一噴除臭劑，再用毛巾一抹，已經攪惦，成個過程一分鐘唔駛。」
媽媽說：「起居飲食唔駛服事呀？」
我說：「又有幾難？倒1/2杯狗糧，放熱水，等15分鐘，再整碎一條肉棒，撈勻，食得。一日兩次，易過借火。」
媽媽說：「你睇下，隻貓好多毛，到時掃地都掃餐矇。」
我說：「我掃咪得囉。」
媽媽說：「你講呀？」
我說：「我咪就係講完就做囉。皮皮D大小便，唔係大部分都係我攪咩？」
媽媽說：「淨係得你攪？我冇攪過呀？」
我說：「你有幫手攪過。不過唔係我迫你攪，而係你自己話攪，唔通你自己話攪，我唔俾你攪呀？」
媽媽說：「屋企咁細，已經有皮皮，仲邊有地方放貓呀？」
我說：「我間房已經夠晒，床下面係狗位，窗口下面咪係貓位囉。」
媽媽說：「一隻貓，一隻狗，你點攪得惦？」
我說：「其實皮皮而家晚晚半夜醒，又去大小便，又要我再暗佢訓，我有叫醒過你同爸爸幫手咩？」
媽媽說：「你而家放假梗係得啦，開左學你邊頂得順？」
我說：「我有信心、有能力。如果真係唔得，我仲可以拜托朋友同教友幫手照顧。」
媽媽說：「你咁咪麻煩到人囉。」
我說：「而家話麻煩嗰個唔係我班朋友同教友，係你呀。就算佢哋屋企真係唔得，我都可以拜托佢哋上黎幫手照顧。」
媽媽說：「嘩，你當左屋企冇掩雞籠呀？」
我說：「屋企一早就已經係冇掩雞籠，我班學生個個星期上黎補習咁多年，你又唔咁講？」
媽媽說：「買隻貓，駛咁多錢。」
我說：「我願意、亦有能力俾晒所有貓貓狗狗既開支。」
媽媽說：「知你而家叻，搵到錢啦。」
我說：「所以咪我俾，咪負責囉。」
媽媽說：「總之我就反對啦。」
我說：「我買埋呢隻貓貓，一貓一狗，我就收手架啦。」
媽媽說：「你講呀嘛。」
我說：「我就係講得出，做得到。由買皮皮開始，有邊件關於買皮皮講過嘅嘢，係講得出做唔到嘅，你講呀？」
媽媽說：「總之我就反對啦。間屋係我既，一齊住要互相遷就。」
我看看妹妹面有難色。
我說：「好，咁我地走。」
媽媽和Thomas回家看皮皮，我和妹妹去Mega Box買枱凳。
.....
我說：「你個樣話我知，你頂阿媽唔順。」
妹妹說：「我唔惦呀，好難堪呀，你個樣好似冇野咁。」
我說：「我冇咩喎，好，要諗吓下一步點做。」
妹妹說：「我真係唔多頂得順，冇心情諗下一步。」
...…
另一個我說：「點解買左皮皮，媽媽對養竉物仲係咁恐懼呢？」
我說：「因為恐懼紮根好深，仲未移除。」
另一個我說：「咁點解媽媽恐懼既反應，妹妹唔多頂得順，你就好似冇嘢咁，仲有心情即刻諗下一步點做？」
我說：「因為我一早就想同媽媽嘅恐懼劃清界線，所以一直求主教我，再按指引行動，親手將媽媽嘅恐懼對我嘅影響連根拔起。」
發表新回應