「我心苦澀複雜，試問又有誰了解❓」
想人了解，自己有責任表達得清清楚楚。
…….
06/07/2021（二）12:30 小巴
我乘搭小巴，由觀塘前往旺角，去寵物診所拿筒筒的醫療報告，申索保險費用。
小巴駛至九龍城，上直往太子的天橋。
乘客說：「司機，你做咩上橋呀？」
司機說：「直去太子咪上橋囉。」
乘客說：「我要喺法國醫院落車呀。」
司機說：「而家冇計嗰囉喎。」
乘客說：「乜你咁揸車架！」
司機說：「唔係你想點揸呀？你想我而家跳橋呀？都白痴嘅你。」
乘客說：「咁樣嘅你！」
司機說：「我點樣呀？你要喺邊度落車，要提早出聲。你早啲講清楚話法國醫院有落嘅，我咪唔上橋囉。」
乘客說：「我第一個上車，第一個俾車錢你架。」
司機說：「但係你冇講話要喺法國醫院落呢！」
乘客說：「嘩，你咁樣唔得呀你。」
司機停車開門。
司機說：「法國醫院就過咗架啦，呢度落唔落呀？」
乘客落車。
……
另一個我說：「唉，你哋班人，我嗰心諗乜，冇人明架？」
我說：「要明啲咩呀？」
另一個我說：「唉。」
我說：「你諗嗰啲嘢，同我哋班人邊個講過呀？」
另一個我說：「講黎做乜？講咗你哋一個二個都唔會明架啦。」
我說：「你嗰啲嘢好深架？博士級研究問題呀？點解講咗都冇一個人會明呀？」
另一個我說：「你哋班人，都冇人經歷過我嗰啲嘢。」
我說：「哦，咁我走先。」
另一個我說：「你去邊呀？」
我說：「練琴囉。」
另一個我說：「乜你咁樣做基督徒架？」
我說：「我點樣呀？你想人明你啲嘢，有責任自己出聲嗰喎。不過就算你自己出聲，我都仲有權選擇聽定唔聽呀！何況我問完都你唔出聲？」
另一個我說：「我一決志信主，第一班認識嘅基督徒就係你哋啦。」
我說：「但係你有咩想我哋了解，你冇講呢！」
另一個我說：「嘩，你咁樣唔得呀你。」
我轉身離開。
另一個我說：「我唔係唔想講呀，係就算講咗，你哋班人都唔會明架，你明唔明呀？」
我說：「你嗰啲諗法係你自己嘅。你想有人明，你係有責任，唔明講到明。」
發表新回應