「作工，是我為主，還是主為我呢❓」
我為主作一次工，主為我作N次工。
......
03/06/2021（四）15:00
學生到達。
我說：「拼音，交咗錄音未？」
學生說：「未錄。」
我說：「句型練習，做咗未？」
學生說：「未做。」
我說：「翻譯，翻咗未？」
學生說：「未翻。」
我說：「好忙呀？」
學生說：「係呀。」
我說：「忙咩呀？」
學生說：「就嚟考試，要溫書；又參加咗寫程式比賽，要練習。」
我說：「哦。」
學生說：「我一陣趕番啲功課俾你呀。」
我說：「唔駛趕。」
學生說：「但係我欠咗你嘅功課喎。」
我說：「你冇欠我呀，你欠你自己咋嘛。功課都唔係我嘅，係你自己架。」
學生說：「吓？」
我說：「你準時交功課對我有咩好處呀？」
學生說：「........」
我說：「你準時交功課，你就越嚟越叻，我就越嚟越忙。」
學生笑。
我說：「既然呢個禮拜都唔得閒做囉，咁而家即刻做啲黎睇吓啦。」
......
另一個我說：「你花咗唔少時間心機，攪《耶穌烘焙坊》呢嗰網頁，為主作工。」
我說：「係呀。」
另一個我說：「主因為《耶穌烘焙坊》得到益處，一定報答你。」
我說：「主得到咩益處呀？」
另一個我說：「你幫主廣傳福音囉！冇你嘅每週分享，都唔知點傳？」
我說：「你有病呀？主係要自己傳嘅，隨時隨地直接同嗰個人講都得啦，保羅咪有眼你睇囉。駛我？」
另一個我說：「咁主又迫你寫每週分享？」
我說：「每週分享唔係主迫我寫架，係主搵教會弟兄姊妹向我提議，最後我自己決定話要寫嗰喎。」
另一個我說：「吓？」
我說：「我寫每週分享，對主有咩益處呀？」
另一個我說：「講開就係啦，等你嗰啲分享，一個禮拜先出得嗰一篇，吱牙膏咁傳。如果我係主，我真係冇咁好耐性，我自己嚟冇咁嬲。」
我說：「咪係囉，我寫每週分享，我同主就越嚟越親近，主就越嚟越忙。」
另一個我說：「主忙咩呀？」
我說：「主一早就要送我去讀翻譯，培養我嘅語文能力；仲要親自與我同行，日日同我經歷生活；跟住要再喺我禱告之中親自帶我回想反思、教我寫低；我寫好初稿之後，跟住又再搵人俾意見我，幫我校對，幫我翻譯；幾耐辛苦改好篇嘢啦，最後再要搵人整個網頁，教我點樣上載到嗰網頁度。」
另一個我說：「主駛唔駛呀？」
我說：「而家仲要帶我去實踐我心所想，上年10月送埋我入學去讀音樂添啦。」
另一個我說：「嘩，主識唔識計數呀？你為主作一次工，主為你做咗N咁多次喎！」
我說：「主愛我呀嘛。」
發表新回應