「屬神的你，什麼果子結得比較少呢❓」
耐性。
......
25/03/2021（二）12:30 家
皮皮嘔吐。
......
25/03/2021（三）
皮皮看過醫生，確診患上腸胃炎。
......
25/03/2021（四）13:00 家
媽媽說：「皮皮尋晚仲係嘔喎。」
我說：「知啦，我book咗醫生4點半。」
媽媽說：「咁快？」
我說：「尋日醫生話，皮皮唔係好嚴重，唔落咁重藥。但係食咗兩次藥，都係嘔，即係唔得啦。咁唔得就要番去再睇架啦。」
媽媽說：「你帶皮皮去？」
我說：「你帶得唔得？」
媽媽說：「邊有話一定唔得架？不過你有咩做？」
我說：「下晏番工，夜晚番學，今晚考試。」
媽媽說：「唉。」
我說：「咁你帶得唔得呀？你唔得我請假啦。」
媽媽說：「邊有話一定唔得架？我都擔心皮皮架嘛。」
我說：「唔該。」
媽媽說：「我一陣早少少3點左右，同皮皮出去。」
我說：「Book咗4點半，咁早出去做咩？」
媽媽說：「睇吓貓砂，啲貓砂就嚟用完啦。」
我說：「咁可唔可以順手買一枝Lysine？」
媽媽說：「咩嚟架？」
我說：「貓傷風食架。」
媽媽說：「筒筒傷風咩？」
我說：「有啲，見到筒筒耐唔耐就打乞嗤。」
媽媽說：「邊度有得買？」
我說：「竉物店。你話一陣睇貓砂，咁睇開咪順手睇吓有冇。」
媽媽說：「竉物店一定有架？」
我說：「唔知，你睇開貓砂，順手睇埋有冇Lysine，得唔得？」
媽媽說：「你打電話去問吓邊間有先講啦。」
我說：「哎呀。你得就得，唔得就算啦。」
媽媽說：「邊有話一定唔得架？但係都要睇吓邊樣緊要啲先得架嘛。要做咗啲緊要嘅，同皮皮睇咗醫生，攪掂晒先攪隻貓嗰啲。」
我說：「我唔知你噏乜。我問你得定唔得，你直接答我得定唔得。」
媽媽說：「唔得呀。」
我說：「唉，得啦。」
.......
另一個我說：「態度？」
我說：「差。」
另一個我說：「耐性？」
我說：「冇。」
另一個我說：「體諒？」
我說：「下次。」
另一個我說：「我為你禱告。」
我說：「咪嘥氣，我唔得架。」
另一個我說：「有神係度，邊有話一定唔得架？」
我說：「咁幾時得呀？」
另一個我說：「唔駛急，屬神但果子結得少嘅枝子，神遲早都會修剪乾淨嘅，祈禱啦。」
發表新回應