「與主對話，如何聽得清楚❓」
所有其他，一律放下。
…….
15/03/2024（五）0805 佐敦某茶餐廳
我一坐下，左面立即傳來一把聲音。
侍應說：「食咩？」
我擰向左邊，看到侍應站在電腦之前，中間隔著一位女士。
女士說：「A餐，腿通，炒蛋，丹麥多，熱啡。」
侍應說：「你呢？」
我說：「你入埋呢張單先，行過嚟我再叫。」
侍應說：「咩呀？」
我加大聲量。
我說：「我話你入埋呢張單先，行過嚟我再叫。」
侍應說：「唔駛，講啦。」
我說：「B餐，牛麵，太陽蛋，餐包，熱央。」
侍應說：「得啦。」
……
數分鐘之後，侍應端來早餐。
我說：「咦？等陣等陣。」
侍應說：「點呀？」
我說：「太陽蛋…餐飽…熱央，腿通？」
侍應說：「你話腿通嘅？」
我說：「我講牛麵喎，叫腿通嗰個都唔係我，係佢呀。」
我看看左手邊正在吃腿通嘅女士。
女士微微點頭。
侍應說：「唔好意思，一時聽錯。」
我說：「所以我咪同你講話，你入埋呢張單先，行過嚟我先再叫囉。」
侍應說：「幫你換番碗牛麵啦。」
我說：「多謝，唔駛啦今次，我趕住番工。」
……
另一個我說：「睇開啲啦。」
我說：「睇開啲咩呀？」
另一個我說：「而家啲人係咁架啦。」
我說：「而家啲人係點？」
另一個我說：「聽嘢聽到天一半地一半。」
我說：「邊啲人？你講個侍應呀？」
另一個我說：「唔止，我聽主講嘢都係咁上下。」
我說：「你聽主講嘢係點？」
另一個我說：「唔…一路YouTube一路聽。」
我說：「主開YouTube Live咩？個Channel叫咩名？」
另一個我說：「或者…一路打機一路聽。」
我說：「你Mute咗嗰遊戲配樂嚟聽主講嘢呀？但係點解你打親機都戴住AirPod嘅？」
另一個我說：「又或者…一路食飯一路聽。」
我說：「你成個頭骨都係通架，成對耳淨係聽到你啲咬嘢聲啦。」
另一個我說：「再或者…一路訴苦一路聽。」
我說：「你除咗聽到你嗰啲苦之外，仲有啲咩？」
另一個我說：「又會…一路事奉一路聽。」
我說：「事奉嗰陣，除咗聽到事奉對象把聲之外，仲聽到其他啲咩聲呀？」
另一個我說：「呀，仲會…一路…」
我說：「夠啦。主講嘢嗰陣，你聽完先再做嚟堆嘢，得唔得呀？」
另一個我說：「唔得，嚟堆嘢好緊要，要做咗先。」
我說：「咁你做晒嚟堆嘢，先再聽主講嘢啦。」
另一個我說：「唔得，嚟堆嘢日日都要做，唔會做得完架。」
我說：「咁你一直繼續做嚟堆嘢，唔好聽主講嘢啦。」
另一個我說：「唔得，我仲有好多禱告等緊主回應架。」
我說：「仲等咩啫？」
另一個我說：「都話等緊主回應囉。」
我說：「乜主講嘢你會聽到咩？」
發表新回應