「風雨交加人在外，你會開門接待嗎❓」
主會。
…….
10/03/2024（日）15:50 君頤峰第二座
Jingo合奏排練錄影。
我落車，致電樂手朋友。
我說：「我到咗啦。」
朋友說：「你喺邊？」
我說：「第二座。」
朋友說：「我而家過嚟，10分鐘左右到。」
……..
另一個我說：「10分鐘？呢度好大風喎，又落雨，天氣又凍，你仲一抽二掕添，又電腦，又譜架，又腳架……」
我說：「你想佢飛落嚟呀？企跳要等啦，佢都唔係住呢座。」
另一個我說：「又濕又凍，點等呀？」
我說：「企埋有瓦遮頭嗰度等。」
另一個我說：「唔惦呀，不如入第二座嗰大堂度等啦。」
我說：「唔得，我都唔係住客。」
另一個我說：「咁點呀？喺呢度企10分鐘呀？樂手未齊已經病啦。」
……
從後傳來一扇開門聲和一把人聲。
保安說：「先生，你不如入黎大堂擋風避雨啦。」
我說：「可以咩？但係我唔係呢度住客喎。」
保安說：「你企喺出面，係咪等緊嚟度嘅住客？」
我說：「係，我朋友喺住呢度，但係唔係呢座，我等緊佢帶我去Clubhouse嘅band房。」
保安說：「你入嚟坐低等啦。」
我說：「真係可以？」
保安說：「入嚟坐啦。」
……
另一個我說：「呢度等好好多，有暖氣，有梳化…」
我說：「我都覺。」
另一個我說：「你識嗰保安架？」
我說：「係呀。」
另一個我說：「幾時識架？我唔知嘅。」
我說：「啱啱囉。」
另一個我說：「妖…即係之前唔識啦。」
我說：「是但啦。」
另一個我說：「佢唔識你，點解要開門俾你入去擋風避雨呀？」
我說：「我點知？不如你問下佢。」
另一個我說：「我係佢，我唔會開門囉，你食風淋雨關我鬼事咩？」
我說：「主會。」
另一個我說：「你又知主會？」
我說：「主啱啱咪叫咗嗰保安開門囉。」
另一個我說：「你又知喺主叫，嗰保安先肯開門？佢自己開門唔得呀？」
我說：「我係嗰保安，我唔會開門囉，我食風淋雨關佢鬼事咩？」
發表新回應