「艱辛的試煉，如何走過❓」
主預備嘅可能性，一試再試喺咁試。
……
25/01/2024（四）1000 Band房
我說：「今日要攪惦份功課啦。」
另一個我說：「咩功課？」
我說：「Music Technology（音樂科技）。」
另一個我說：「幾時交？」
我說：「28號，星期日。」
另一個我說：「仲有4日，慢慢嚟。」
我說：「完全冇時間觀念。」
另一個我說：「咩呀？我有計錯數咩？四、五、六、日，咪四日囉。」
我說：「你冇計錯數，不過你失憶啫。五、六、日我都要番工，今日係唯一一日全日放假。」
另一個我說：「星期六你下半晝唔駛番架？」
我說：「我仲有一份Counterpoint（對位法）未做，一首dance（舞曲）未分析，同埋一首中樂嘅第二樂段未作。」
另一個我說：「攪錯。你咁多嘢做，但手腳咁慢。」
我說：「唔同你講咁多，做嘢。」
我打開混音軟件Pro Tools。
另一個我說：「點解唔用Logic Pro X？」
我說：「APA指定要用Pro Tools做。」
另一個我說：「你識用Pro Tools咩？」
我說：「唔識，而家第一次用。」
另一個我說：「喂，你download嗰條聲，喺Pro Tools點剪？」
我說：「唔知，我打算問主預備咗嘅技術顧問。」
另一個我說：「邊個？」
我說：「YouTube。」
另一個我說：「嘩，大海撈針。你條音檔想剪幾耐呀？」
我打開YouTube搜尋，觀看數條影片，跟著指示，試完又試。
我說：「攪惦。跟住將條Audio Track，分成好多條。」
另一個我說：「點分呀？又YouTube呀？想分到幾時？」
我打開YouTube搜尋，觀看數條影片，跟著指示，試完又試。
我說：「攪惦。跟住要落Effect。」
另一個我說：「要落幾多個Effect？點落呀？你剪咗分咗咁多條Track出嚟。又YouTube呀？想落到幾時？」
我打開YouTube搜尋，觀看數條影片，跟著指示，試完又試。
我說：「攪惦。跟住Pan。」
另一個我說：「咩Pan呀？煎Pan呀？YouTube有嘅咩？」
我打開YouTube搜尋，觀看數條影片，跟著指示，試完又試。
我說：「攪惦。跟住Fade-in Fade out。」
另一個我說：「我都唔知你講乜？好累啦。」
我打開YouTube搜尋，觀看數條影片，跟著指示，試完又試。
我說：「攪惦。跟住Bounce。」
另一個我說：「癡線，煩到嘔，都唔係人做。」
我打開YouTube搜尋，觀看數條影片，跟著指示，試完又試。
我說：「攪惦。兩分鐘嘅Music Technology功課出爐。」
另一個我說：「簡直係燃燒生命，兩分鐘嘅音檔，俾你攪咗兩個鐘都唔止。」
我說：「係冇停咁攪咗三個半鐘。」
另一個我說：「主真係玩鬼你，俾個試煉太難啦。」
我說：「有幾難？」
另一個我說：「兩分鐘嘅音檔，你攪咗成三個半鐘，過程用嘅時間足足係結果嘅105倍呀，癡線。」
我說：「你就癡線。」
另一個我說：「我癡線？我有計錯數咩？」
我說：「你冇計錯數。我話你懶到癡線咋嘛，主今次嘅試煉，解決方法喺晒YouTube度啦，你有上堂，明咗啲基本概念，逐個YouTube video睇，跟住試，遲早實試到。」
另一個我說：「咁試法天黑都未惦。」
我說：「咩呀？我未天黑就攪惦攞喎。」
另一個我說：「我啲時間唔係咁用。」
我說：「咩你啲時間呀？啲時間都唔係你嘅！係主借俾你架咋。」
另一個我說：「癡線。」
我說：「用主借出嘅時間，接受番主預備嘅試煉，跟住成長得益，賺晒喎我哋。究竟有咩咁癡線呀？」
另一個我說：「真係癡線。」
我說：「你係咪話緊自己真係懶到癡線呀？唔緊要，主一早知架啦，下次努力啲就得啦。」
發表新回應