「不可能，如何找到可能❓」
運用主賜的智慧，變一變，再試。
…….
29/11/2023（三）1400 香港演藝學院 X719
七星陣第一次排練
負責彈奏古箏和二胡的同學A和B到達。
試奏開始。
同學A說：「第一段同第六段嘅古箏，節奏不規則，好複雜。」
我說：「係呀，有冇可能做到？」
同學A說：「唔……」
我說：「如果唔得，咁我不如刪除咗對唔齊嗰幾個音。」
同學A說：「得。」
我說：「得，即係彈到。」
同學A說：「即刻彈唔準，我番去練習一下，下次彈。」
我說：「辛苦晒。」
……
同學B說：「第三段嘅二胡，一句之內有四分音，三連音，八分音，五連音，仲要不規則加咗好多Chromatic Note（半音），速度快，好難拉。」
我說：「係呀，有冇可能做到？」
同學B說：「唔……」
我說：「如果唔得，咁不如分四部曲練。」
同學B說：「第一部曲？」
我說：「淨係練節奏，唔理音高，慢練。」
同學B說：「第二部曲？」
我說：「保持節奏，加音高，慢練。」
同學B說：「第三部曲？」
我說：「保持節奏同音高，加Chromatic Note，慢練。」
同學B說：「第四部曲？」
我說：「保持節奏、音高同Chromatic Note，加速。」
同學B說：「好，我番去練。」
我說：「辛苦晒。」
……
07/12/2023（四）1100 香港演藝學院 A121
七星陣第二次排練
古箏二胡試奏成功。
……
另一個我說：「你就好啦，唔係嗰個都咁好彩架。」
我說：「好咩彩呀又？」
另一個我說：「好彩主肯出手幫你囉。」
我說：「主有話過唔肯出手幫你咩？」
另一個我說：「有啲嘢就唔駛講到咁白嘅。我有問題咁耐都見唔到主出過手，心照啦。」
我說：「心照？你有冇順手照埋你嗰腦？」
另一個我說：「咩意思呀？你講嘢有冇再難聽啲呀？想話我冇腦呀？唔好單單打打，白啲啦。」
我說：「有啲嘢就唔駛講到咁白嘅，咁你究竟有冇用主賜俾你嗰個腦諗過，落過主賜俾你嗰隻手試過唔同方法呀？」
另一個我說：「要我用腦諗，郁手試，問題先有可能解決到嘅，咁仲要主嚟做乜嘢？」
我說：「你差唔多全錯，除咗最尾嗰句。」
另一個我說：「邊句？」
我說：「呢句：咁仲要主嚟做乜嘢？」
另一個我說：「我冇講過我唔要主。」
我說：「有啲嘢就唔駛講到咁白嘅，你腦又唔用，手又唔郁，問題就要解決，乜你要嗰個喺主，唔係阿四咩？」
發表新回應