「自我修復，向誰致謝❓」
主，這是主賜的能力。
……
15/09/2023（五）08:00 家
我起來刷牙。
媽媽說：「筒筒好嘢，幫你慳番一筆。」
我說：「筒筒番工？」
媽媽說：「癡線，筒筒嘔呀。」
我說：「嘔仲好嘢？」
媽媽說：「嘔啲衰嘢出嚟咪好囉。」
我說：「筒筒嘔咗啲咩衰嘢出嚟？」
媽媽說：「毛。」
我說：「毛？」
媽媽說：「總共嘔咗12條，我影晒相架。」
媽媽向我展示相片。
我說：「嘔點搵錢，啲毛有人買呀？」
媽媽說：「癡線。嘔咗啲毛出嚟，胃口好番，冇肚痾囉。佢身體唔好，喺咪要俾錢左驗右驗呀？咁仲唔慳番一筆呀？」
我說：「嘩，咁大獲？」
媽媽說：「我上網睇，呢啲叫毛球症，即係食埋食埋啲毛，喺嗰肚度捲埋一舊。」
我說：「點算呀？」
媽媽說：「食吐毛膏，吐毛粉，一係痾出嚟，一係嘔出嚟。」
我說：「食完都痾唔出，嘔唔出啲毛咁點呀？」
媽媽說：「咁咪搵醫生麻醉開刀，攞返出嚟。」
我說：「咁真係慳番一筆，睇醫生好貴。」
媽媽說：「錢財身外物，都算啦。」
我說：「你俾呀？」
媽媽說：「你俾。你先係筒筒老豆，我有愛心，幫你手架咋。」
我說：「嘩，一講錢即割席。又話錢財身外物？」
媽媽說：「總之你俾。仲有，啲貓一麻醉，有可能醒唔番，就咁就瓜埋。」
我說：「嘩，咁真係感謝主。」
媽媽說：「感謝主？」
我說：「梗係啦，唔係隻隻貓都自己嘔得出架，呢個排毛能力係主賜。」
媽媽說：「喂，你一日到黑死咗出去，你呀筒筒都係我照顧架咋。」
我說：「感謝你照顧筒筒。」
媽媽說：「咁就差唔多。」
我說：「不過呢單嘢都係要感謝主。」
媽媽說：「又感謝主？」
我說：「係，筒筒自己排毛呢個能力，乜你同我有本事俾到佢咩？」
發表新回應