「長年累月的問題，從何入手❓」
主派專家教路，我立即跟住做。
……
19/07/2022（三） 12:30 Studio
LMusTCL樂理課
老師說：「播你首String Quartet（弦樂四重奏）黎聽下。」
我說：「OK。」
我按播放鍵。
老師說：「停。」
我說：「OK。」
我按停止鍵。
老師說：「第8小節Viola（中提琴）聽唔聽到有錯音呀？」
我說：「吓？聽到錯咩音？」
老師說：「A Natural錯咗，應該係A Flat，你用緊F minor呀嘛。」
我說：「嘩，係喎。我其他聲部都用A Flat，係Viola攪錯咗A Natural。嘩，你咁都聽到嘅，超乎想像！」
老師說：「聽到好正常，作曲連自己寫嘅嘢都聽唔到先怪，聽力係作曲基本功，要練好耐，長年累月咁練，你最好即刻開始練。」
我說：「點練？」
老師說：「打開份譜，播首音樂，日日反反覆覆咁聽，聽到聽到為止。」
……
另一個我說：「聽力要長年累月咁練，你而家冇聽力，咁係長年累月都冇練啦。」
我說：「係呀。」
另一個我說：「咁由邊首曲聽起好？」
我說：「唔知，而家嘅我練聽力，成首曲聽好似太難。」
另一個我說：「咁點算？」
我說：「祈吓禱先。」
……
21/07/2022（五） 18:00 香港國際音樂學校
琴藝坊
爵士鋼琴課
我說：「老師，你主修爵士鋼琴？」
老師說：「唔係，其實我一開始主修聲樂，後來再進修爵士鋼琴。」
我說：「主修聲樂？」
老師說：「係呀。」
我說：「太好啦。禮拜二上作曲嗰陣，老師話我要改善聽力，建議我成首曲對譜聽。但我發覺呢個方法對而家嘅我嚟講太難，你有冇啲再基礎啲方法練聽力？」
老師說：「有。」
我說：「嗰方法係點？可唔可以教一教我？」
老師說：「可以，嗰方法係聽Interval（音程）。」
我說：「點聽法？」
老師說：「有兩種聽法。第一，Melodic Interval（旋律音程），兩個音分開聽，跟住哼，再講嗰Interval出嚟。」
我說：「另一個方法呢？」
老師說：「第二，Harmonic Interval（和聲音程），兩個音一齊聽，，跟住哼，再講嗰Interval出嚟。」
我說：「明白。咁聽咩Interval先？」
老師說：「Major 2nd（大二度）同Minor 2nd（小二度）。不如而家試下？」
我說：「好呀。」
一輪練習過後，
老師說：「你音準都唔錯啦。」
我說：「之前五音不全，上完學校視唱練耳已經好好多，不過要做到作曲，仲有排練。」
老師說：「我哋啱啱練完，你今個禮拜番去明點練未？」
我說：「明。Teoria有得聽Interval，咁我番屋企一個人用Teoria練，得唔得？」
老師說：「得，你番屋企練，下堂番黎我抽少少時間Check下你練成點，好冇？」
我說：「好呀，唔該晒。」
……
另一個我說：「嘩，聽力呢科嘢，係長年累月嘅問題黎架，你知唔知？」
我說：「我知。」
另一個我說：「呢啲長年累月嘅問題，唔係一時三刻解決到嘅問題黎架，你知唔知？」
我說：「我知。」
另一個我說：「你知，你知，你點知？」
我說：「主星期二派作曲老師話我知囉。」
另一個我說：「呢啲唔係一時三刻解決到嘅問題，係要用合適嘅方法一步一步慢慢改善嘅問題黎架，你知唔知？」
我說：「我知。」
另一個我說：「呢啲要用合適嘅方法一步一步慢慢改善嘅問題，係一路需要有專人跟進，定期檢查有冇再攪錯嘅問題黎架，你知唔知？」
我說：「我知。」
另一個我說：「你又知，你又知，你呢次點知呀又？」
我說：「主星期五派爵士鋼琴老師話我知不突止，仲幫我跟進。」
另一個我說：「呀，係喎。」
我說：「拿，你問咗四條問題，我就全部答晒你啦，而家輪到我問番你。」
另一個我說：「問啦。」
我說：「如果要落實解決呢啲長年累月嘅問題，而家要做咩，你知唔知？」
另一個我說：「仲有咩要做？咩嘢都俾主派黎嗰兩位音樂專家講晒啦。」
我說：「你唔係專家，唔係負責講。你係問題持有人，主一派專家教路，你係負責立即跟住指示做，一步一步解決自己嗰問題，知唔知呀你？」
另一個我說：「咪住，等等先，你有所不知啦，呢啲長年累月嘅問題，你估我想有嘅咩？我都好慘架，我之所以有呢啲問題，都係因為我生不逢時、為世所迫、時不與我、身不由己……」
我說：「清楚晒，你而家究竟想點，我清楚晒啦。」
另一個我說：「你清楚晒，我而家究竟想點？」
我說：「你而家想嘅就係，呢啲長年累月嘅問題，繼續拖落去，一直黏住你，直至死亡為止，永遠都得唔到解決囉。」
另一個我說：「你把口好毒呀，咁樣講我。我唔係咁黑心架。」
我說：「乜我有講錯你咩？你唔係咁黑心，咁主派埋專家黎教路跟進，你都仲係度講埋一大堆廢話，唔即刻郁？」
發表新回應