「主出謀獻策，如何把握❓」
謙卑採納，立即試行。
……
12/04/2023（三）15:55 WhatsApp
樂手A傳來短訊。
樂手A說：「你好。」
我說：「你好。」
樂手A說：「唔好意思呀，十五號我要好早番工。」
我說：「哦。」
樂手A說：「不過十四號可以練習嘅，只係希望早啲返去休息啫。」
我說：「收到。」
……
另一個我說：「咁點算？」
我說：「我點知？」
……
14/04/2023（五）11:36 WhatsApp
樂手A說：「唔好意思。」
我說：「係。」
樂手A說：「我今晚應該九點半左右走。」
我說：「收到。」
……
另一個我說：「約好八點半開始，本來十點半先完，佢而家九點半左右就走？」
我說：「係呀。」
另一個我說：「咁咪得番一個鐘練？」
我說：「準確啲黎講，一個鐘都冇。」
另一個我說：「點解？」
我說：「遲吓到，熱吓身，休息下，預最多得番四十五分鐘啦。」
另一個我說：「首曲進度點？」
我說：「未完整奏過一次。」
另一個我說：「死得啦，祈禱都冇用啦。」
我說：「呀！我諗到條橋。」
另一個我說：「幾時諗架？」
我說：「啱啱祈禱嗰陣。」
另一個我說：「講。」
我說：「早走我留佢唔住啫，我可以叫佢早啲黎嘅啫。」
另一個我說：「早幾多？」
我說：「早半個鐘，八點，嗰band房我book早咗半個鐘，我而家去群組問。」
另一個我說：「唔得。」
我說：「點解呀？」
另一個我說：「早半個鐘，你唔駛番工呀？」
我說：「我今晚收七點，即走趕得切。」
另一個我說：「唔得。」
我說：「又點解呀？」
另一個我說：「而家要早走嗰個係佢，點解要你問？」
我說：「檔嘢我架，而家佢作曲發佈，定我作曲發佈呀？」
……..
14/04/2023（五）13:05 WhatsApp
我在作曲發佈第一組解釋事情之後，開了一個WhatsApp調查。
我說：「今晚八點練習，大家OK嗎？」
樂手B說：「OK。」
樂手C說：「OK。」
樂手A說：「OK。」
……
14/04/2023（五）18:00
另一個我說：「夠鐘要決定啦，仲差一個未應，點算呀？祈禱啦。」
我說：「呀！我諗到條橋。」
另一個我說：「又諗到，快啲講。」
我說：「我打電話俾佢。」
另一個我說：「唔得。」
我說：「點解呀又？」
另一個我說：「你係作曲黎架，成個訓練安排已經係你攪晒架啦，錢又係你俾晒，而家你仲要主動打埋俾佢？要唔要面呀你？拿，應該係咁先啱…」
我說：「收擋啦你，阻住。」
我致電樂手D，但無人接聽。
另一個我說：「抵死，攞嚟衰，模門釘，食檸檬，唔聽你電話呀。」
我說：「唉…」
另一個我說：「祈禱都冇用啦。」
我說：「我又諗到條橋。」
另一個我說：「講啦。」
……
14/04/2023（五）18:05 WhatsApp
我宣布：「我決定今晚提早八點練習，我暫時未聯絡到樂手D，祈求主帶領佢睇到我嘅宣佈，到時準時過黎。」
一分鐘之後。
樂手D說：「OK。唔好意思，遲咗回應。」
…….
另一個我說：「主偏心。」
我說：「無可能，你多心就真。」
另一個我說：「你出問題一禱告求問，主就幫你出謀獻策啦。」
我說：「你出問題一禱告求問，主一樣會幫你出謀獻策架。」
另一個我說：「主冇。」
我說：「主有。啱啱先出過謀獻完策，不過條橋唔啱你心水，你自己話唔得，主動放棄咋嘛。」
另一個我說：「我冇講過話唔得。」
我說：「吓？冇講過？練早啲，你話唔得。WhatsApp問大家，你又話唔得。打電話問樂手，你都話唔得。你總共講咗三次唔得喎。所以最後一次我決定八點練習，都廢事同你商量。」
另一個我說：「點解呀？」
我說：「嘥時間。」
發表新回應