「如何信主無上限❓」
信主不但是救主，更是生命的主。
…….
2022/12/01（四）19:28 WhatsApp
耶穌烘焙坊網頁設計員傳來短訊。
設計員說：「葉sir，我見你嗰網站，有好多欄位開咗都係冇乜用過。」
我說：「係呀，其實嗰網站而家得番我一個人用。」
設計員說：「咁我想幫你整理下嗰網站。」
我說：「吓？」
設計員說：「仲想幫你重新設計過嗰首頁。」
我說：「吓？」
設計員說：「想睇吓你有冇興趣咁囉？」
我說：「有。」
設計員說：「我暫時有一個方案嘅。」
我說：「講。」
設計員說：「嗰形式同我近排寫緊嘅網站有少少相似。」
我說：「即係點？」
設計員說：「即係將所有分類攤晒出嚟，寫晒係首頁。」
我說：「簡單直接，正。你報嗰價，傾啱價就開始設計。」
設計員說：「唔駛架啦。」
我說：「吓？」
設計員說：「其實都係啲簡單嘅，我想幫你執一執嘅啫。」
我說：「多謝晒。」
…….
另一個我說：「你親兄弟呀？」
我說：「唔係。」
另一個我說：「你表親呀？」
我說：「唔係。」
另一個我說：「你死黨呀？」
我說：「唔係。」
另一個我說：「你主內弟兄呀？」
我說：「唔係。」
另一個我說：「你學生呀？」
我說：「唔係。」
另一個我說：「咁佢係乜水呀？」
我說：「我學生嗰同學。」
另一個我說：「即係幾乎同你冇關係啦。」
我說：「係。」
另一個我說：「冇關係，免費幫你重新設計過嗰網頁？邊個會信呀？」
我說：「而家我淨係聽到你唔信啫。」
另一個我說：「咁點解呢個幾乎同你冇關係嘅人，自願主動提出免費幫你更新嗰網頁呀？」
我說：「主叫佢嘅，我深信。」
另一個我說：「主點解要叫佢幫你呢個二打六？」
我說：「咩二打六咁難聽呀，嗰網頁篇篇反思我都係為主寫架，主關心下我呢個愛佢嘅人，搵人幫我更新嗰網頁吓，好出奇咩？」
另一個我說：「好出奇喎！你唔好喺度妖言惑眾，專登伸隻腳出嚟絆倒人啦。」
我說：「我點樣絆倒人？」
另一個我說：「你攪到人哋以為主好無聊。主係救主，冇你咁得閒，唔會浪費時間攪埋呢啲無謂嘢。」
我說：「同你講嘢真係無聊兼嘥氣。主唔止係救主，仲係生命嘅主，主超越時間，有能力亦願意花時間關心我整個生命嘅每一個細節。」
另一個我說：「你又知主願意？」
我說：「主唔願意，你有本事迫到主做咩？二打六！」
另一個我說：「堂堂創天造地萬民敬仰嘅主，幫你呢個二打六搵人免費翻新網頁？搵鬼信呀？」
我說：「連鬼都信耶穌係掌控一切嘅主。而家係你，喺度將耶穌限制成只係救主，淨係識喺災區處理救援工作啫。」
發表新回應