「主的指示，如何一一把握❓」
行事別處處計較自己的利益。
…….
07/02/2023（二）23:00 Band房
我正在執拾行裝，預備明天演藝學院的1st Audition。
另一個我說：「執齊嘢未？」
我說：「執齊啦。其實都冇乜要執，演藝話聽日都係介紹自己認識吓咁啫。」
另一個我說：「收工。」
我索起背囊，突然腦海閃出一個意念。
我解開背囊，拿起枱面的I-pad。
另一個我說：「你做乜呀？」
我說：「Air Drop我作嗰四首落部 I-pad度，再擺部I-pad入袋。」
另一個我說：「神經呀你，演藝講咗話2nd audition先會傾你嗰四首曲，聽日去介紹吓自己咋。你知唔知呀？」
我說：「知。」
另一個我說：「知，咁你仲帶部I-pad去做乜？」
我說：「但啱啱嗰腦閃過一個意念。」
另一個我說：「So What？」
我說：「嗰意念話，叫我Air Drop啲譜過I-pad，再帶埋去1st Audition。」
另一個我說：「真係神經，放低嗰I-pad，我唔想聽日成日孭住件冇用嘅電子產品走黎走去。」
我說：「唔得。」
另一個我說：「點解呀？」
我說：「如果嗰意念係主俾我，咁點算？」
另一個我說：「證據呢？」
我說：「我冇。」
我把I-pad放進袋中。
另一個我說：「真係神經，專做廢嘢，孭死我。」
…….
07/02/2023（三）16:00 香港演藝學院作曲及電子音樂系A121電子音樂室門口
我坐下，拿出I-pad，打開樂譜，放在大腿上。
另一個我說：「你攞部I-pad出嚟做乜？」
我說：「I-pad都帶咗囉，唔差在攞埋出嚟預備，一陣1st Audition可能有用。」
另一個我說：「聾架你，都話2nd Audition先傾你嗰四首曲囉，真係神經。」
…….
07/02/2023（三）16:15
作曲及電子音樂系系主任打開房門。
系主任說：「葉偉雄。」
我說：「我係。」
系主任說：「入嚟啦，到你啦。」
我說：「哦。」
系主任說：「知唔知嚟度係邊度？」
我說：「香港演藝學院，作曲及電子音樂系，A121電子音樂室。」
系主任說：「啱，咁你今日黎做乜？」
我說：「1st Audition。」
系主任說：「啱，介紹吓自己。」
我說：「好。」
我介紹自己背景，學習音樂的歷史進程和當下繼續進修作曲的渴求。當我提及在香港國際音樂學校的作曲發佈會之際……
系主任說：「你交黎演藝嚟四首曲，原來會發佈架？」
我說：「係呀。」
系主任說：「幾時？」
我說：「今年11月。」
系主任說：「搵到人奏未？」
我說：「搵到。」
系主任說：「開始練未？」
我說：「練咗三次啦。」
系主任說：「你第一首曲好似叫Errer，係咪？」
我說：「係，Errer。」
系主任說：「Errer點解？」
我說：「遊蕩。」
系主任說：「攞份譜出嚟。」
我說：「吓，今日唔係傾下計，認識吓啫咩？」
系主任說：「有冇帶譜？」
我說：「有。」
系主任說：「攞份譜出嚟。」
我把大腿上的I-pad遞給系主任，系主任打量一番。
系主任說：「bpm=144，好快，奏唔奏到？」
我說：「練習先發現奏唔到。」
系主任說：「仲有冇咩嘢，喺練習嗰陣先發現奏唔到？」
我說：「Bar 10，原本我寫嘅係figure係，16分音符嘅ascending wave form，oboe奏唔到，之後我改咗做ascending chromatic scale，oboe就奏到。」
系主任說：「OK。」
系主任轉去另一個話題。
…….
我離開A121室。
另一個我說：「又話今日傾吓偈，認識下嘅啫？」
我說：「係呀。」
另一個我說：「係又冇啦啦叫人攞譜出嚟。」
我說：「呢啲叫臨時改動。」
另一個我說：「車，鬼知咩！」
我說：「鬼係未必知，主就一定知，仲有一樣都一定知。」
另一個我說：「咩嘢？」
我說：「你唔想知道主嘅指示。」
另一個我說：「咪老屈喎，我不知幾想知主每一步嘅指示，咁我就唔駛你祝，都一帆風順，萬事如意啦。」
我說：「你想知？咁尋晚喺Band房我同你講突然有個意念，你又喺度阻住我Air Drop同帶I-pad？」
另一個我說：「嘩你咁馬後炮點得架？你當時有充分證據可以肯定嗰意念係主俾你咩？」
我說：「冇。」
另一個我說：「冇充分證據仲信，仲Air Drop同帶I-pad？」
我說：「真係神經！有充分證據肯定嘅，駛乜你信呀？」
另一個我說：「如果今日嗰結果係，系主任照常規出牌，唔駛睇譜嘅，嗰I-pad咪白攞。」
我說：「正一算死草，少少都唔肯付出。白攞咪白攞囉，駛死呀？我寧願白攞，都唔想錯過主俾我嘅任何一個指示。」
發表新回應