「主行事，需要跟人商量嗎❓」
不需要，主自有分數。
……
25/06/2022（三）11:30 Band房
同學過來練習Piano Duet（鋼琴二重奏），預備六月初初級證書的學生音樂會。練習過後，準備離開之際…
同學說：「你演藝嗰邊問咗未？」
我說：「問咗啦。」
同學說：「可唔可以報Master Degree？」
我說：「唔得，除非我讀MA (Masters of Arts) 。」
同學說：「但係你已經有Master Degree，仲要重新讀過Bachelor？」
我說：「係呀。因為我唔讀MA，我要讀Music Degree。一定要由BMus (Bachelor of Music)，讀起。」
同學說：「BMus要Full time讀嗰喎？」
我說：「係呀。」
同學說：「讀幾耐？」
我說：「四年。」
同學說：「嘩，咁嚟四年咪冇得再教大學？」
我說：「係呀。其實準確啲，應該係五年。」
同學說：「點解仲要多一年？」
我說：「我問過老師，佢話以我而家嘅音樂能力，演藝未必收，就算收，都九成要我讀多過一年音樂基礎文憑。」
同學說：「唔得呀，咁咪成五年都冇得再教大學？點維生？」
我說：「吓？放學去補吓習咁囉。」
同學說：「夠架啦？」
我說：「唔夠咪攞埋啲積蓄出嚟囉，勉強夠交學費嘅。」
同學說：「咁屋企呢？」
我說：「屋企人經濟獨立嘅。」
同學說：「唔駛俾家用？」
我說：「要，一路都有俾。不過一全職讀，就真係未必俾到咁多，到時有幾多俾幾多啦。」
同學說：「咁生活費呢？」
我說：「呢個真係我都唔知，睇吓主到時點啦。」
同學拿出咭片，遞給我。
我說：「做乜？」
同學說：「你有冇咭片？」
我說：「冇呀。係喎，可以整番張，搵私補學生。」
同學說：「整啦。」
我說：「咪住，你有冇呢張咭片嘅template？」
同學說：「想用我嗰template嗰設計，換啲字就出。」
我說：「係呀，我唔識設計，你介唔介意？」
同學說：「冇問題，番屋企搵嗰template俾你。」
我說：「多謝你，感謝主。」
…….
25/06/2022（三）16:39 WhatsApp
同學寄來咭片的PDF範本。
同學說：「我試過用Adobe Acrobat Pro編輯文字，但唔成功；我之前嗰designer可能用咗photoshop之類嘅軟件設計，另存成output file，再攞去e-printing做咭片印刷。你可能要下載免費Photoshop試吓啦。」
我說：「收到，多謝晒。」
…….
25/06/2022（三）18:16 WhatsApp
我把咭片轉寄給妹妹，並告訴她咭片的事。
我說：「我想你試吓你公司部腦有冇程式開到嗰Template，我想編輯入面啲資料。」
一會兒後，
妹妹說：「冇喎，你自己下載Adobe AI 或者Photoshop試吓。」
我說：「OK，唔該。」
……
另一個我說：「咁自己番去慢慢摸啦。」
我說：「唯有係咁啦。」
……
25/06/2022（三）18:25 WhatsApp
我WhatsApp轉寄咭片Template給Maggie和諾行，分享主今天如何協助我拓展私人學生網絡，為日後全職讀書做預備。
諾行說：「即係佢俾佢卡片嘅template你，你入返你嘅資歷落去？咁之後你打算派卡片定po上網？」
我說：「Po上網。」
諾行說：「photoshop可以試下幫你做做，雖然我係新手，如果你唔介意。」
我說：「嘩，實在太好啦，感謝你，感謝主。」
諾行說：「其實揾過個template都得，張卡片個設計都唔適合你，同埋唔太靚。」
我說：「好呀，你決定呀。」
諾行說：「如果maggie有需要嘅話我都可以幫佢。」
我說：「好呀。」
……
Maggie說：「如果你搵到個Designer幫你再設計過吓張咭，咁就最好啦。」
我說：「主搵咗啦。」
Maggie說：「吓？」
我說：「諾行囉。佢話你有需要嘅話，可以幫埋你。」
Maggie說：「唔該晒，等我到時再問吓佢。」
…….
另一個我說：「你同Maggie幾時祈禱問主攞咭片？」
我說：「冇祈禱問過主喎。拿，我就一定冇，Maggie都唔聽見佢講過。」
另一個我說：「仲話冇？你冇問，邊個叫諾行幫手？」
我說：「你有聽到我叫諾行幫我咩？」
另一個我說：「我問你，邊個叫主，叫諾行幫手？」
我說：「主自己叫諾行。」
另一個我說：「你祈禱冇問，主會叫？你蝦我唔識嘢呀，我假假哋都信咗成主成13年嗰喎。」
我說：「慳啲啦，你以為我係乜水呀？點解主要聽咗我禱告先可以叫諾行呀？」
另一個我說：「咁你同學呢？你唔好話俾我知，你冇禱告求咭片，主叫你同學送張咭片上嚟呀？」
我說：「全中。」
另一個我說：「冇可能。」
我說：「我連整咭片都諗唔到，點禱告向主求咭片呀？」
另一個我說：「你禱告冇講，主點知？」
我說：「主一開始就乜都知，我禱告冇講，唔知嗰個係你咋嘛。」
另一個我說：「你即係話我無知啦。」
我說：「你信咗成13年，主全知你都仲係唔知，你話你係咪無知呀？」
另一個我說：「咁禱告即係廢架啦？」
我說：「點解廢？」
另一個我說：「而家你禱告都冇講，主就自己攪惦晒。咁即係唔駛聽你啲意見啦，呢次咭片啱心水就好啫，下次唔啱心水點算呀？」
我說：「主做嘢，一路都唔駛我哋意見，一路都唔駛同我哋商量架。」
另一個我說：「即係我講咩，主都唔理我啦。」
我說：「主唔理你，禱告就唔聽你講嘢啦。好似我哋又無知又好似撞聾嘅，成日祈嗰啲嘢都唔係主心意，主唔單止冇發爛渣，仲好有耐性想盡方法話我哋知佢嘅心意嗰囉喎。」
另一個我說：「唔好講到咁偉大，而家係我禱告講完，主照跟佢自己嘅意思去做。」
我說：「做乜要跟你意思做呀？你知唔知自己係乜水？你瞓醒未？」
另一個我說：「我都不知幾清醒，我好清楚我而家講嘢冇晒牙力嘅，主完全唔跟嘅。冇晒牙力，仲祈禱嚟做乜？」
我說：「你要牙力做乜？做乜要主跟你呀？你想做主呀？」
發表新回應