本週反思#213💬

「人人邀請，就可團圓❓」

有時，要主邀請才行。

…….

01/02/2022（二）13:30 年初一 家

媽媽說：「老豆，約咗你個女、同埋家姐飲下午茶。」

爸爸說：「幾點？」

媽媽說：「兩點。」

爸爸說：「喺邊度飲？」

媽媽說：「御宴。」

爸爸說：「我哋未打針喎。」

媽媽說：「你個仔同個女打咗呀嘛。」

爸爸說：「五個人飲，得兩個人打咗針，要分枱坐嗰喎。」

媽媽說：「分枱咪分枱囉。」

爸爸說：「我唔去，你哋咪可以坐埋一張枱囉。」

我說：「同樓面講想要兩張隔離嘅枱咪得囉。」

爸爸說：「分咗枱點講嘢？」

我說：「我分枱，你哋傾咪得囉，我齋食俾錢唔講嘢都得嘅。」

媽媽說：「係啦，新正頭大年初一，一家人一齊飲茶先開心架嘛。」

爸爸說：「唔去，你哋去。」

我說：「咁好啦，改變主意就打俾我，行啦，夠鐘。」

我開門。

媽媽說：「等埋。」

……

01/02/2022（二）13:45 年初一 裕民坊

媽媽說：「你有冇攪錯？」

我說：「攪咩錯呀？」

媽媽說：「新正頭大年初一都唔氹下嗰老豆飲茶。」

我說：「仲氹咩呀？你咪已經邀請咗佢去囉。」

媽媽說：「咁你都可以幫手氹多兩句架嘛。」

我說：「喂，我氹到出晒面囉喎！我自願分枱，齋食俾錢唔講嘢，仲要俾埋佢改變主意嘅門路，咁佢都唔郁，仲唔走呀？」

媽媽說：「咁你都唔駛走得咁急架嘛。」

我說：「佢都話唔去囉，約好晒，夠鐘啦。」

媽媽說：「你好鬼黑人僧。」

我說：「你而家都急急腳走咗出嚟喎，你夠好鬼黑人僧囉。」

媽媽笑，說：「正死仔，我廢事同你講。」

……

01/02/2022（二）14:00 年初一 酒樓

我和媽媽走出電梯，看見妹妹和大姨媽。

我說：「入去啦。」

妹妹說：「爸爸呢？」

我說：「佢話唔黎。」

妹妹電話響起，說了兩句，掛線。

樓面說：「小姐，請問幾多位？」

妹妹說：「五位，兩個人打咗針，想要兩張隔離嘅枱。」

我說：「五位？我哋得四個人咋喎。」

妹妹說：「唔係，爸爸啱啱打俾我話過嚟。」

我望向媽媽，媽媽笑。

…….

另一個我說：「你阿媽同你都好想你老豆一齊去飲茶喎。」

我說：「梗係，佢出口我出手啦。」

另一個我說：「咁你老豆點解開頭唔去？」

我說：「問佢先知喎。」

另一個我說：「咁你老豆點解最後又去？」

我說：「人都黎咗，仲問咁多做乜。」

另一個我說：「但係我想知喎。」

我說：「咁你問主啦。」

另一個我說：「問主？」

我說：「乜我哋出咗門口之後，仲有其他人同佢講過嘢咩？」