「為何所成就的，會遠超過我所想所求呢❓」
極有可能是，神想實踐祂的計劃。
……
17/06/2021（四）13:00 香港國際音樂學校
實科演奏課
主任說：「奏。」
我說：「OK。」
我合手奏了Minuetto in C。
主任說：「淨係右手，奏多一次。」
我說：「OK。」
我奏了Minuetto in C的右手部分。
主任說：「淨係左手，奏多一次。」
我說：「OK。」
我奏了Minuetto in C的左手部分。
主任說：「彈係彈到，不過音色完全唔得。」
我說：「點解？」
主任說：「因為手指唔夠獨立。」
我說：「咁點算？」
主任說：「逐句，逐個音，逐隻手指再練。」
我說：「OK。」
主任說：「不過已經6月尾，8月尾就考試。」
我說：「係喎。」
主任說：「唔得，考3首，其他嗰兩首都要開。」
我說：「咁呢首仲練唔練呀？」
主任說：「你有時間都要盡力練到最好。」
我說：「OK。」
主任說：「有啲急，最好就搵個人幫下你。」
我說：「搵人幫下我？」
主任說：「係呀，你考慮搵佢幫吓你啦！」
我說：「佢咪係上次學生音樂會聽過我試奏嘅學長？」
主任說：「係呀，佢跟我學咗好耐架啦，我教嗰套佢吸收晒。」
我說：「你建議我搵佢？」
主任說：「係呀，你啱啱跟我學，好唔穩定。兩個月後就考試啦，我一個禮拜先見你一次，如果想做好，你練兩三日，最好就搵人執一執。」
我說：「明白，多謝。」
……
另一個我說：「你啱啱祈禱黎呀？」
我說：「啱啱冇喎，不過祈禱就成日架啦。」
另一個我說：「你平時點祈禱？」
我說：「咪諗到想講咩，咪同神講咩囉。」
另一個我說：「咁你係咪諗到實科考試，搏命祈禱求神幫你備試呀？」
我說：「冇搏命求喎。準確啲講，係冇咩點求。」
另一個我說：「冇咩點求？」
我說：「係呀，神已經派咗主任教我啦嘛。」
另一個我說：「咁神做咩又要派多個學長黎幫你呀？咪已經叫咗主任教你囉，仲唔夠呀？」
我說：「我都以為夠，但係今日主任一講，原來得番兩個月，仲有兩首未開始。」
另一個我說：「你慢你嘅事。最緊要係你冇求，神做咩要叫完主任派學長呀？」
我說：「我諗，盡力備試，可能唔單止係我想，神都想。」
另一個我說：「神做咩想幫你備試呀？你過唔過到考試，讀唔讀得成音樂，全部都係你自己一個人嘅事！」
我說：「或者讀音樂唔單止係我自己一個人嘅事，仲係神嘅計劃呢！」
另一個我說：「係神嘅計劃又點呀？」
我說：「如果我讀音樂係神嘅計劃，咁神認為過程中我需要經歷啲咩，神就會安排俾我架啦。」
另一個我說：「哦，係神嘅計劃，神就會安排俾你。咁你就可以躺平，唔駛想唔駛求啦？」
我說：「梗係唔係，我唔想唔求就琴都唔練啦。只係如果係神嘅計劃嘅話，所成就嘅，係會遠超過我所想所求。」
發表新回應