「信主之路，一步一步，盡是苦痛❓」
若苦痛不斷，思路行徑，可能出錯。
......
24/05/2021（一）18:00 香港國際音樂學校
實科演奏課
老師說：「好，彈新嗰首。」
我說：「Over the Rainbow?」
老師說：「坐前啲。」
我移前坐位。
老師說：「右手先。」
我彈奏12個小節右手的旋律。
我說：「點呀？」
老師說：「放低嗰膊頭。」
我放低膊頭。
老師說：「好，左手。」
我彈奏12個小節左手的分解和弦和柱狀和弦。
我說：「點呀？」
老師說：「份譜啲音好難睇咩？」
我說：「唔係呀。」
老師說：「咁你彎晒腰，哄到咁埋做咩呀？」
我說：「我哄到好埋咩？」
老師說：「係呀，你唔係睇緊譜，你聞緊譜。」
我尷尬地笑。
老師說：「腰挺直，眼望前。」
我腰挺直，眼望前。
老師說：「合手。」
我合手奏了12個小節。
老師說：「你都未熟，彈咁快做咩？攪到隻手咁緊張。」
我說：「好緊張咩？」
老師說：「梗係啦，你又小臂，又大臂，咩力都出齊，手指力就夠啦。」
我尷尬地笑。
老師說：「唔怪之得你成日話練琴練到呢度痛，嗰度痛啦。」
我尷尬地笑。
老師說：「腰挺直、眼望前、手放鬆、速度慢，拍子機60，淨係手指，合手，再黎。」
......
另一個我說：「有邊個成功鋼琴家行過嘅路，唔係有血有汗架？」
我說：「冇。」
另一個我說：「有邊個基督徒行過嘅信主之路，唔係一步一步，盡是苦痛架？」
我說：「有。」
另一個我說：「邊個呀？」
我說：「我囉。」
另一個我說：「點解？」
我說：「改咗個腦諗嗰啲錯嘢，咪唔苦；改埋手腳嗰啲錯嘅動作，咪唔痛囉。」
另一個我說：「你點知錯架？」
我說：「苦痛話我知！」
另一個我說：「知就改到架啦？點改先得架你？」
我說：「祈禱問神，開口問人囉。」
另一個我說：「做咩下下都要麻煩神，攪到人姐？你又知我自己嗰條藥方唔得？」
我說：「你嗰條藥方得嘅，點解會苦咁耐、痛咁耐呀？下？你嗰條咩藥方黎架？毒藥呀？」
另一個我說：「駛唔駛咁鬼惡呀你？係咪祈禱問咗神，開口問咗人就得架啦？」
我說：「問完收到，就落手改啦，唔該！」
發表新回應