「我立志，誰會認真落實呢❓」
我會；主若認同，祂會更認真落實。
……..
03/05/2024（五）1200 愛加倍福音堂
我應邀出席一班傷健基督徒的合奏訓練。
訓練完成後，與負責人開一個簡短的會議。
負責人說：「嚟緊9月8號佢哋有嗰公開演出。」
我說：「演出頭先嗰幾首歌呀？」
負責人說：「未決定，應該係當中揀幾首。」
我說：「但係咁奏法，效果麻麻哋。」
負責人說：「所以我咪邀請你嚟囉。」
我說：「嚟編曲？」
負責人說：「全中。有冇諗法？」
我說：「唔……有。但係佢哋有唔同程度嘅限制，編完都要試。」
負責人說：「好呀，你編，我叫佢哋試。」
我說：「可唔可以搵其他音樂人同佢哋夾？」
負責人說：「歡迎。」
我說：「好，咁我做埋啲功課就編曲。」
負責人說：「好。」
…….
另一個我說：「真係無事不登三寶殿。」
我說：「唔好講到佢賺晒咁啦，我都賺咗鍛練編曲能力嘅機會。」
另一個我說：「你而家讀緊演藝架啦，仲編呢啲！」
我說：「噏乜呀你？咩邊啲唔好呀？」
另一個我說：「主都唔知攪乜？」
我說：「你好似有啲善忘。」
另一個我說：「你就善忘，一聽見有人搵你編曲，就主姓乜都唔記得，唔篩唔選，雞咁腳應承。」
我說：「你記唔記得，當日喺我自己話，將來想成為全方位作曲家。」
另一個我說：「咩全方位作曲家？」
我說：「即係對方音樂上有咩想做到嘅，都有能力作到、編到嘅作曲家。」
另一個我說：「你幾時講埋啲咁嘅嘢？」
我說：「咪喺2023年11月26號，國音作曲發佈嗰陣講嗰囉。」
另一個我說：「嘩，而家已經喺2024年5月囉喎，過咗差唔多半年，呢啲都已經成為歷史文件，邊個仲會認真落實，咁傻架？」
我說：「我囉，你喺咪話緊我傻呀？」
另一個我說：「我冇話你傻，話你咪即係話我自己，我先冇咁傻。」
我說：「唔係話我傻，咁即係話主傻呀？」
另一個我說：「我點敢話主傻呀？傻嘅咩？不過主真係，駛唔駛咁認真呀？講吓啫。」
我說：「又唔係話我，當日立志，今日實踐，傻；又唔係話主半年前聽完我立志，今日安排機會俾我實踐，傻。咁……我知道你話邊個傻啦。」
另一個我說：「我話邊個傻呀？我自己都唔知喎。」
我說：「你囉。你自己立志，主俾機會，你都唔認真落實，自己倒自己米，喺咪傻？」
另一個我說：「閘住，你立志啫。我冇立志，亦唔會立志。唔立志，就唔駛實踐，亦唔駛勞煩主安排機會俾我實踐。」
我說：「咁傻嘅你？又唔立志，又唔實踐，咁你日日喺度做乜鬼呀？」
發表新回應