「如何跟主學習處事穩妥呢❓」
主凡事有定時，我也盡力守時。
……
07/04/2024（日）20:00 Band房
另一個我說：「死啦，死啦，死啦。」
我說：「主死一次就夠啦，你死咁多次做乜呀？」
另一個我說：「咪講笑啦，大件事啦。」
我說：「咩事呀？」
另一個我說：「篇歌劇翻譯嘅校對同二譯未做呀。」
我說：「你急咩啫？我一日未死，一日都可以對，得啦，聽日對。」
另一個我說：「唔得！」
我說：「點解唔得呀？」
另一個我說：「定咗今晚23:59之前交。」
我說：「咁而家黎。」
另一個我說：「唔得！」
我說：「點解唔得呀又？」
另一個我說：「你今朝9點教書教到而家，太累啦。」
我說：「你話累咋嘛，我都冇話累。你累就自己死去瞓，唔好阻住我。」
另一個我說：「唔累都唔得！」
我說：「點解呀？」
另一個我說：「我哋計劃咗有嘢做。」
我說：「有咩做？」
另一個我說：「夜晚不嬲都要練樂器架啦，你唔駛吹Clarinet呀？」
我說：「咪吹少晚囉，考狀元咩？何況我係作曲黎架，支笛屎啲冇乜人會介意。」
另一個我說：「都係唔得，你同學校行政講，延期啦。」
我說：「唔得。」
另一個我說：「你唔好意思講延期呀？咁唔講咋唔知，由佢過期囉。」
我說：「更加唔得。」
另一個我說：「乜你咁麻煩架，呢樣唔得，嗰樣唔得，唔得就…」
我打開電腦，開始校對二譯。
……
07/04/2024（日）23:32 WhatsApp
校對二譯完成，我寄出翻譯。
……
08/04/2024（一）18:30 香港國際音樂學校 校務處走廊
行政迎面而來。
行政說：「收到翻譯啦。」
我說：「咁就好啦。」
行政說：「我好鍾意你準時。」
我說：「音樂人係應該要準時嘅。」
行政說：「好多音樂人都唔準時架。」
我說：「佢哋遲唔關我事，我想做個準時嘅音樂人呀嘛。」
……
另一個我說：「叻啦，唔識人啦，唔會遲到嘅音樂人。」
我說：「唔抵得行政讚我準時呀？」
另一個我說：「我冇講過唔抵得，我話你叻呀，唔識人啦，唔會遲到嘅音樂人。」
我說：「我唔識你仲會同你傾咁耐？我冇講過我唔會遲到，絕對準時得主一個先做到嘅，我都係盡力跟主學吓嘢咁啫。」
另一個我說：「咁快搵定下台階啦，咁你都好屎啫。」
我說：「我今次唔屎喎，仲好穩妥，即使好忙，啱啱都準時交咗歌劇翻譯。」
發表新回應